От ыйын 22 күнүгэр СӨ Быыһыыр сулууспатыгар Муома улууһун Кыайыы хайатын аттынааҕы Күрэтэр диэн муус дьапталҕатыгар турист кыргыттар үөһэттэн сууллубуттарын туһунан иһитиннэрии киирбит.
Кэнники биллибитинэн, аҕыс киһилээх бөлөх, түөртүү буолан икки аҥы арахсан, хайаҕа тахсан испит. Биир баайыыга хайалара эрэ сыыһа туттан бары бииргэ сууллан түспүттэр. Ол түмүгэр, биир кыыс төбөтүн уонна түөһүн эчэппит, оттон икки кыыс сотолорун тоһуппуттар. Бастакы кыыһы атын туристар көмөлөөн лааҕырга аҕалбыттар, оттон икки кыыс үөһэ хаалбыттар.
Онон, ыйыллыбыт сиргэ Өймөкөөн Уус Ньаратыттан халааҥҥа үлэлии сылдьар быһааччылар көппүттэр. Кинилэр сүрүн лааҕыртан төбөтө уонна түөһэ эчэйэн сытар кыыһы Уус Ньара балыыһатыгар аҕалбыттар. Оттон үөһэ хаалбыт тостуулаах кыргыттары аҕала альпинист быыһааччылар уонна Катастрофа мэдиссиинэтин быраастара «Полярные авиалинии» МИ-8 бөртөлүөтүнэн көтүөхтэрэ.
Салайааччы Иннокентий Андросов эппитинэн, атахтара тостубут кыргыттарга көтөн тиийии уустуктардаах. Тыала суох буоллаҕына, бөртөлүөт быһылаан буолбут сиригэр көтөн тиийиэн сөп. Оччоҕо быыһааччылар туристары парашюта суох десаннаан ылыахтара. Эбэтэр бөртөлүөтү тэйиччи хаалларан баран хайаны уҥуордаан, кыргыттары муус дьапталҕанан наһыылканан түһэриэхтэрэ. Бу ордук куттала суох эрээри, сырдыкка эрэ кыаллар.
Сонун төрдө: СӨ Быыһыыр сулууспата
