«Полярные авиалинии» авиахампаанньа көтөр аалларын паарката элбэх соруктаах икки Ми-8МТВ-1 бөртөлүөтүнэн хаҥаата. Тырааныспары «Судаарыстыбаннай тырааныспар лизинин хампаанньата» (ГТЛК) АУо-тан лизинг дуогабарынан ыллылар.
Үөрүүлээх туттарыы от ыйын 29 күнүгэр Казаннааҕы бөртөлүөт собуотугар буолла. Тэрээһиҥҥэ Татарстан өрөспүүбүлүкэтин баһылыга Рустам Минниханов, «ГТЛК» АУо салайааччыта Евгений Дитрих, «Арассыыйа бөртөлүөттэрэ» АУо салайааччыта Николай Колесов, «Казаннааҕы бөртөлүөт собуота» АУо салайааччыта Николай Яковлев кытыннылар. Саҥа Ми-8МТВ-1 күлүүһүн «Полярные авиалинии» хампаанньа салайааччыта Семен Винокуров тутта.
- 2017 сылтан саҕалаан биһиги 7 бөртөлүөтү ылбыппыт. Оттон бүгүн өссө икки Ми-8МТВ-1 эбилиннэ. Тырааныспар хоту сир тыйыс усулуобуйатыгар сөптөөҕүн уонна бөҕө оҥоһуулааҕын көрдөрбүтэ. Онон, хотугу авиацияҕа туохтааҕар да ордук ирдэнэр. Бу үөрүүлээх түгэн Саха сирин авиациятын 100 сылыгар түбэспитэ олус бэлиэ. Икки бөртөлүөттэн биирин «Саха сирин авиациятын 100 сыла» диэн ааттыахпыт, - диэн Семен Викторович үөрүүтүн үллэһиннэ Якутии.
Сонун төрдө: «Полярные авиалинии» хампаанньа пресс-сулууспата
