2021 сыл ахсынньытыттан сокуоннай салалтата суох олорор СӨ Суруйааччыларын сойууһун иһигэр үөскээбит уустук быһыыга-майгыга бүтэһиктээх туочука турар чинчилэннэ. Ол эбэтэр, от ыйын 22 күнүгэр Дьокуускай куорат суута 2024 сыл ахсынньы 11 күнүгэр Владислав Доллонов салайыытынан ыһыллыбыт СӨ Суруйааччыларын сойууһун уочарата суох быыбардыыр сийиэһин түмүгүнэн суруллубут боротокуол быһаарыылара дьиҥэ суохтарын бигэргэттэ.
Онон, хаста да көспүт (эппиэттээччи Владислав Доллонов, эппиэттэһээччилэр суукка кэлбэттэриттэн сылтаан) суут мунньаҕа, СӨ Юстиция министиэристибэтин олохтоох управлениетын докумуоннарыгар, туоһулар көрдөрүүлэригэр уонна хомуллубут матырыйаалларга олоҕуран, сиэрдээх быһаарыыны таһаарда.
Санатар буоллахха, 2024 сыл ахсынньы 11 күнүгэр бары бэрээдэги тутуһан, биир сүбэнэн ыҥырыллыбыт быыбардыыр сийиэһи салайар уорган боломуочуйатын сокуоннайа суохтук ыла сатыыр Владислав Доллонов, туспа иккис бэлиэтэнии тэрийэн, хамыыһыйа бэрэссэдээтэлин үлэтиттэн туоратан, микрофону былдьаһан, айдааны таһааран, соруйан ыһан кэбиспитэ, онтон сөбүлэспэт чилиэннэр барбыттарын кэннэ сымыйа боротокуолу толорон сийиэһи ыытыллыбытынан аахпыта.
Онон, тахсан барбыт чилиэннэр, итинник нүдьү-балай быһыыны утаран, Дьокуускай куорат суутугар ыытыллыбатах сийиэс түмүгүнэн суруллубут боротокуол быһаарыыларын дьиҥэ суоҕунан ааҕарга ирдэбил суруйбуттара. Бу ирдэбил сөптөөҕө, инники этиллибитин курдук, дакаастанна. Суут быһаарыыта сокуоннай күүһүгэр киирэ илик. Эппиэттээччи, буоларын курдук, ааһынар санаалаах.
Бэйэ кэр.
