Бу күннэргэ Владимир куорат собуотугар Дьокуускай куорат маршруттарыгар анаан “Волгобас” диэн саҥа 35 оптуобус таҥылла сылдьар. Оптуобустар маҥнайгы баартыйалара оҥоһулла турарын туһунан куорат аҕа баһылыга Евгений Григорьев тэлэгэрээм-ханаалыгар суруйар.
Бастакы баартыйаны сэтинньи ортотугар таҥан бүтэриэхтэрэ. Оттон хаалбыт 15 массыынаны ахсынньы бүтүөр диэри оҥоруохтара. Итиннэ гынан, быйыл Дьокуускайга саҥа 50 оптуобус аҕалыахтара.
Собуоттан саҥа сүүрдүллэн тахсыбыт тырааныспар бэлиэтээһиннэри уонна тустаах оҥоһуулар кэннилэриттэн куорат маршруттарыгар тахсыахтара, эргэрбит 50 “пазиктары” солбуйуохтара.
Санатан эттэххэ, 2022 сылтан куорат иһигэр уонна таһыгар сүүрэргэ, дьону таһарга анаан 124 саҥа оптуобус атыылаһыллыбыта. Билигин таҥылла сылдьар 50 оптуобуһу кытары холбоотоххо, сыл бүтүүтэ кыһыл оптуобустар ахсааннара 174 буолуо.
Сонун төрдө уонна хаартыска: https://web.telegram.org/k/#@EvgenyGrigorev
