Бу күннэргэ үтүө, хорсун санааны уонна ыксаллаах быһыыга-майгыга сөптөөх хамсаныыны кыра уолчаан көрдөрдө. Бээди сүрүн оскуолатын 2-с кылааһын үөрэнээччитэ Эрхан Захаров киһи олоҕун быыһаата.
Ол курдук уолчаан доҕотторун кытта таһырдьа оонньоон баран борук-сорук буолуута дьиэлээн иһэн ким эрэ “быыһааҥ” диэн көмө көрдөһөр саҥатын истэн тохтуу биэрбит. Тэйиччи сиргэ киһи сытарын көрөөт, төһө да көмө көрдөөччү аттыгар сүөһүлэр тоҕуоруспуттарыттан салла санаатар, “хайаан да көмөлөһүөхтээхпин” диэн бигэтик санаабыт.
Сүүрэн тиийэн киһини туруора сатаабыт да, кыайыа суоҕун өйдөөн, чугастааҕы ыалга тиийэн тыллаан, охтубут киһиэхэ көмөлөспүттэр.
Кэнники бу киһи инсуллаан охтубута, хаарга икки чаас сыппыта биллибит.
Икки хонон баран ыарыһах чугас дьоно Эрхаҥҥа пакет суумканы толору минньигэс ас тутуурдаах кэлэн: “Эн үтүө быһыыны оҥороҥҥун тыыннаах хаалла”, – диэн махтаммыттар. Оттон оскуола салалтата киэн тутта хорсун уолу махтал суругунан, бэлэҕинэн бэлиэтээбиттэр.
Бу туһунан Мария Аргуно суруйар.
Бэйэбититтэн эбэн эттэххэ, Эрхан Захаров киһи олоҕун быыһаабыт хорсун уонна үтүө быһыыта судаарыстыба да таһымнаах наҕарааданан бэлиэтэниэн сөп. Холобур, “Өлөн эрээччилэри быыһааһын” мэтээлинэн. Онон тустаах уорганнар уонна биэдэмистибэлэр Мария Аргуно суруйуутун бэлиэҕэ ылыахтара диэн эрэнэбит.
