Аҕыйах хонуктааҕыта, ааспыт ый 27-с күнүттэн саҕалаан 29-с күнүгэр диэри, өрөспүүбүлүкэбит килбэйэр киинигэр – Дьокуускай куоракка – “Сыыппара алмааһа” диэн ааттаах, бүтүн дойду таһымнаах, номнуо үтүө үгэс буолан эрэр IV пуорум буолан ааста. Пуорум добун түһүлгэтигэр Саха сиригэр үлэлиир технологическай хампаанньалар бырамыысыланнаска, авиацияҕа уонна мэдиссиинэҕэ быһаччы сыһыаннаах инновациялаах бырайыактарын билиһиннэрдилэр. Бу улахан тэрээһин АЛРОСА хампаанньа көҕүлээһинэн ыытыллар. Хампаанньа өрөспүүбүлүкэ Инновация сайдыытыгар пуондатыныын стартаптары дьиҥнээх оҥорон таһаарыыга сыһыарар тиһиктээх үлэни тэрийэр уонна Саха сиригэр ИТ эйгэ сайдыытын үбүлүүр.
2025 сыллаахха АЛРОСА хампаанньа уонна Саха өрөспүүбүлүкэтин Инновация сайдыытыгар пуондата технологическай хампаанньалары өйүүр, кинилэргэ кыттыһан көмөлөһөр туһунан икки өрүттээх сөбүлэһиини түһэрсибиттэрэ. 2025 – 2028 сыллардаахха бырайыагы олоххо киллэрэргэ барыта 100 мөлүйүөн солкуолбай көрүллүбүтэ. Ити харчы саха хампаанньалара бырамыысыланнас үлэтин-хамнаһын кыаҕын-таһымын үрдэтэргэ, ити эйгэҕэ цифровизацияны киллэрэргэ, омук оҥоһугун бэйэ киэнинэн солбуйарга аналлаах айымньыларыгар туттуллуохтаах.
Бырамыысыланнаска – цифровой быһаарыыны
“Сыыппара алмааһа” пуорумҥа “ОШЕР” диэн саха хампаанньата хайа бырамыысыланнаһын тиэхиньикэтин оборудованиета уонна шината эрэллээхтик үлэлиирин салайар тиһиги прототибын айбытын билиһиннэрдэ. Бу айымньы матырыйаалынай саппааһы салайарга уонна быһыылаан буолар төрүөтүн тиһиктээхтик ырытарга-анаарарга аналлаах.
Салайар тиһик оҥорооччулара этэллэринэн, маннык айымньыны олоххо киллэрдэххэ, хампаанньалар сыл аайы хастыы да мөлүйүөн солкуобайы кэмчилиэхтэрин сөп буолар.
“Эрэллээх үлэ тиһигэ – эрдэттэн хааччыныы, сэрэтии тиһигэ – биһиги оҥорон таһаарбыт айымньыбыт ону ырылхайдык көрдөрөр. Бырамыысыланнай хампаанньалар айымньыбытын сэҥээрэллэриттэн көрдөххө, ылсарга бэлэмнэр. Ол кинилэр быһылаан содулун туоратардааҕар эрдэттэн сэрэппиттэрэ ордугун бэркэ билэллэрин туоһулуур. Тиһикпин улахан көдьүүстээх буолуоҕа диэн эрэнэбит. Айымньыбыт сайдыытыгар уонна оҥорон таһаарыы үлэтин-хамнаһын кыаҕын-таһымын күүһүрдэргэ АЛРОСА-ны уонна Инновация сайдыытын пуондатын кытта үтүө түмүктэри ситиһиэхпин диэн итэҕэйэбит”, – диэн хампаанньа дириэктэрэ Виктор Белостоцкай кэпсээтэ.
Авиацияҕа бэйэ оҥоһуга: “Хорус” кэтиир тиһик
Алмаасчыттары кытта бииргэ үлэлэһии түмүгэр олоххо киирбит биир саамай ситиһиилээх бырайыак – “СмартЮнит” диэн саха хампаанньата анал бырагыраамалар Дьопуруопаттан киирэллэрэ тохтообутун кэннэ айан-толкуйдаан таһаарбыт, сөмөлүөт-бөртөлүөт мотуордарын кэтээн көрөргө аналлаах “Хорус” тиһигин бырайыага. “Хорус” тиһик 2023 сыллаахха эрэ айыллыбыта эрээри, билигин “АЛРОСА” авиа-хампаанньаҕа номнуо туһанылла сылдьар.
“Билигин биһиги тиһикпит кыаҕын-таһымын улаатыннарарга, арыый кэҥэтэн биэрэргэ үлэлэһэ сылдьабыт. Ол чэрчитинэн трендэлэр дириҥээбит анаалыстарын олоххо киллэрэр, “Аласкар” авиация тиэхиньикэтин техиньиичэскэй көрүүтүн-истиитин уонна өрөмүөнүн хаамыытын автоматизациялыырга бырагыраамабыт тиһигин кытта дьүөрэлиир былааннаахпыт”, – диэн “СмартЮнит” тэрилтэ кэмиэрчэскэй дириэктэрэ Артем Петухов кэпсиир.
Сыыппаралаах уларыйыы – АЛРОСА сайдар тосхоло
АЛРОСА хампаанньа технологическай бырайыактарга мэлдьи инвестициялыыр уонна ИТ-хампаанньалар ырыынакка күрэстэһэр кыахтаах хаачыстыбалаах бородуусуйаны оҥорон таһааралларыгар көмөлөһөр.
“Кэлиҥҥа алта сыл иһигэр АЛРОСА хампаанньаҕа сыыппара күүскэ өтөн киирэн элбэҕи уларытта. Цифровизация оҥорон таһаарыыттан саҕалаан үлэ-хамнас хаамыытыгар барытыгар киирдэ: геология чинчийиитигэр, хайа бырамыысыланнаһын оҥорон таһаарыытын моделлааһыныгар уонна былааннааһыныгар, үлэ-хамнас хаамыытын салайыыга, тырааныспар-тиэхиньикэ комплексыгар, үүттүүр-дэлби тэптэрэр үлэҕэ уонна да атыҥҥа. Ол түмүгэр былаанныыр хаачыстыбабыт, үлэбит кээмэйэ уонна оҥорон таһаарыыбыт көдьүүһэ хас эмэ уонунан бырыһыанынан тубуста”, – диэн АЛРОСА информация технологиятыгар дириэктэрэ Вадим Желтухин кэпсээтэ.
АЛРОСА Инновация сайдыытын пуондатын кытта саха хампаанньаларын атын айымньыларын-оҥоһуктарын эмиэ өйүүр:
“ЯКИТ.ТЭП” – биисинэс үлэтин-хамнаһын автоматизацията;
“Платформа” – “АЛРОСА” авиа-хампаанньа саайтын уларытыы;
“Скиллометр” (Софтвэй++) – кэмпитиэнсийэлэри сыаналыыр тиһик;
“Сайберия” – маммология эйгэтин бырайыага;
“Северные решения” – “Портал поставок Якутии”;
“Новые технологии” – АЛРОСА авиа-хампаанньаларыгар аналлаах RMS.
kyym.ru
