Бөөлүүн Мэҥэ Хаҥаласка Майа уонна Төҥүлү икки ардыгар массыынабыт рулевой тягата тостон алдьархайга түбэһэн, эрэйи көрөн олордохпуна, Майатааҕы ЕДДС сулууспатын үлэһитэ Слава уонна Мэлдьэхси нэһилиэгин баһылыга Валерий Никифоров кэлэн көмөлөстүлэр.
Кинилэр биһигини Майаҕа илдьэн сапчаас маҕаһыыннаах Михаил диэн табаарыстарын маҕаһыынын астаран, сапчаас ылларан, төттөрү тиэйэн аҕалан, эбиитин онтуларын бэйэлэрэ уларытан, атааран биэрдилэр.
Маннык үтүө санаалаах саха дьоно баар буоланнар дьиэбитин сарсыарда 4 чааска этэҥҥэ буллубут. Бу омос көрдөххө борустуой гынан баран, түүҥҥү тымныы, хараҥа бириэмэҕэ букатын да билбэт дьоҥҥо тугу кыайалларынан, сатыылларынан ыарахан балаһыанньаҕа көмөнү оҥоруу туспа хорсун быһыы дии саныыбын уонна кинилэргэ улахан махталбын тиэрдэбин.
Ону таһынан ааһан иһэн тохтоон сүбэ-ама буолбут үс-түөрт суоппарга, чуолаан, Хорообут олохтооҕо, кыра массыыналаах, оҕолорун тиэйэ сылдьар эр бэрдэ туораан кэлэн, Мэлдьэхси нэһилиэгин солбуйар баһылыга тохтоон, аймахпыт, Ньурбаттан төрүттээх эдэр күтүөт Иван, Нуоранаҕаттан кэлэн тыл-өс, сүбэ-ама буолбуттарыгар истиҥ махталбын тиэрдэбин!
Биһиги, тыйыс айылҕаҕа олорор саха дьоно, маннык дьон баалларынан киэн туттуохтаахпыт уонна ыччаппытын маннык буоларга иитиэхтээхпит. “Ойуурдаах куобах охтубат” диэн бу буоллаҕа....
Валерий Никифоров бэрт судургу, ыллам киһи эбит. Көрөн турбата, кини быһаарыы ыла охсоро түргэнэ, дьиҥ саха толкуйдааҕы, күчүмэҕэй түгэҥҥэ бэлэмнээҕэ көһүннэ. БАҺЫЛЫК диэн маннык буолуохтаах!
Бары көмөлөспүт дьоҥҥо махталбын тиэрдэбин. Сахалар маннык буоллахпытына өлөн-охтон биэриэхпит суоҕа.
Петр АТЛАСОВ, СӨ Национальнай бибилэтиэкэтин үлэһитэ, Уус Алдан, Өнөр.
04.01.2026 сыл.
Хаартыска: интэриниэттэн.
