Саха суруналыыстыкатын биир чаҕылхай, ураты дьэргэлгэннээх, туспа тырымнаах сулуһа, биир идэлээхпит, доҕорбут Иван Петрович Ушницкай тохсунньу томороон тымныытыгар сүрэҕэ тэбэрэ тохтоото. Соҥуоран тураммыт олох уһун суолугар эрэллээх тирэх буолбут тапталлаах кэргэнигэр Вера Ивановнаҕа, кэскил кэрэтин кэтэһэр оҕолоругар, сиэннэригэр дириҥ кутурҕаммытын тиэрдэбит.
Биһиги Уйбааммыт Сэбиэскэй Сойуус бэчээтин күнүгэр, ыам ыйын 5 күнүгэр, күн сирин көрбүтэ. Орто дойдуттан Арассыыйа бэчээтин күнүн кэмигэр арахсар буолла. Чахчы Үрдүк Айыылартан суруналыыс буоларга айыллан кэлбит чинчилээх.
Суруналыыстыка эйгэтигэр эмньик эдэр сааһыттан, оскуола кэнниттэн, үктэммитэ. Успуорт эйгэтин, тустууну саастаах киһи курдук мындырдык ырыҥалыырын, таныктаахтык суруйарын сэргии көрөн “Эдэр коммунист” хаһыат салалтата үлэҕэ ыҥырбыта. Ол кэмҥэ үрдүк үөрэҕэ суох киһини хаһыат кэрэспэдьиэнинэн ылбат кэмнэрэ этэ. Ол да буоллар Ваня Ушницкай 1980 сыл ыам ыйын 5 күнүгэр, сэбиэскэй Бэчээт күнүгэр, бэйэтин төрөөбүт күнүгэр, 19 сааһыгар хаһыат үлэһитэ буолбута. Онтон ыла үлэлии-үлэлии кэтэхтэн үрдүк үөрэҕи бүтэрэн, үүнэн-сайдан саха суруналыыстыкатын биир чаҕылкай сулуһа буолан сандааран тахсар. 1993 сылтан “Саха сирэ” хаһыат ыччакка аналлаах “Эдэр саас” сыһыарыытын бастакы эрэдээктэрин быһыытынан саҥа көрүүлээх, санаалардаах бэчээти тэрийээччи, салайааччы, олоҕу инники хамсатарга ыччаты түмээччи, көҕүлээччи буоларын көрдөрбүтэ. Онтон “Орто дойду”, “Киин куорат” хаһыаттары тэрийбитэ. Саха сиригэр буолан ааспыт эрэпириэссийэни дьаныардаахтык хасыһан Иван Николаевтыын “Центральное дело” диэн кинигэни таһаарар. Онтон салгыы “Ойууттар, удаҕаннар”, “Оо, Сахаачча, Сахаачча...” диэн кинигэлэри суруйар. Арассыыйа суруйааччыларын сойууһун чилиэнинэн ылыллар. Үгүс тэрээһиннэри толкуйдаан таһаарар, ыытар. Ити курдук, Уйбаан суруналыыстан уопсастыбаннай үлэһит буола үүнэн тахсар. Саха АССР Үрдүкү сэбиэтин XII ыҥырыылаах мунньаҕын дьокутаата буолар.
Иван Ушницкай үгүс журналисткай бириэмийэ лауреата, В.В. Никифоров-Күлүмнүүр аатынан журналисткай бириэмийэ лауреата, Уус Алдан улууһун бочуоттаах олохтооҕо, Дүпсүн уонна Хатырык (Нам) нэһилиэктэрин бочуоттааҕа.
Киһи быһыытынан доҕорбут олус элэккэйэ, үөрүнньэҥэ. Кини ураты юмордааҕа, үгүс сэһэннээҕэ-сэппэннээҕэ. Бэйэтэ хараҕа ыалдьан, үгүс эпэрээссийэни ааспыт буолан аһыныгас, амарах санаалааҕа. Ыалдьыбыкка, быстарбыкка кыаҕа баарынан көмөлөһө сатыыра.
– Халыҥ хаардаах тоҥ сиртэн үүнэн тахсар ньургуһун күүстээх санаа, кэрэҕэ тардыһыы символа буолар, — диэн Уйбаан саас аайы ньургуһуҥҥа аналлаах тэрээһини ыытар этэ. – Күн уотун курдук сылаас санаабытын биэрэн, хас биирдии саха сүрэҕэр ньургуһуну тылыннарыахтаахпыт...
Сахатын сирин, дьонун-сэргэтин муҥутуурдук таптыыр, күүстээх санаалаах, хорсун-хоодуот, ньургун киһи, тус бэйэтин талаанынан тахсан, хас биирдии саха сүрэҕэр ньургуһуну тылыннараары айан-тутан, үлэлээн-хамсаан аастаҕа.
“Эдэр коммунистан” эҥэрдэспит суруналыыс доҕотторо.
