Тохсунньу 10 күнүгэр кэллиэгэбит, биллиилээх суруналыыс, публицист, уопсастыбаннай диэйэтэл, В.В. Никифоров-Күлүмнүүр аатынан СӨ судаарыстыбаннай бириэмийэтин, Саха хомсомуолун бириэмийэтин лауреата, СӨ култууратын үтүөлээх үлэһитэ, “Эдэр саас”, “Орто дойду”, “Киин куорат” хаһыаттар тэрийээччилэрэ уонна салайааччылара, элбэх кинигэ ааптара Иван Петрович Ушницкай олохтон барбытынан дириҥ күтүрҕаммытын тиэрдэбит.
Иван Ушницкай быыһык кэм кыһалҕаларын кырдьыктаахтык сырдаппыт, сытыы матырыйаалларынан уопсастыба болҕомтотун тардыбыт, сабыылаах тиэмэлэргэ бастакынан суруйан, саха суруналыыстыкатын саҥа үрдэлгэ таһаарбыт суруналыыс этэ. Бэлиитикэҕэ, устуоруйаҕа, успуорка, атын да уопсастыба тирээн турар боппуруостарыгар дириҥ хорутуулаах, ыллыктаах ыстатыйаларын, интервьюларын, репортажтарын өрөспүүбүлүкэ бүттүүнэ кэрэхсии ааҕара, долгуйа күүтэрэ. Үтүө доҕорбут, кэллиэгэбит Уйбаан быдан дьылларга быраһаай! Хаалларбыт дьоһун суолуҥ кэлэр көлүөнэ суруналыыстарга идэҕэ бэринии үрдүк холобура буоллун!
“Кыым” хаһыат, “Ситим-Медиа” тэрилтэ.
