Олунньу 1 күнүттэн Арассыыйаҕа социальнай төлөбүргэ, өҥөнү туһанааччылар бырааптарын көмүскэлигэр уонна баан эйгэтигэр сыһыаннаах кэккэ уларыйыылар киирдилэр. Онтон быһа тардан билиһиннэрдэххэ...
Социальнай төлөбүр уонна индексация. Олунньу 1 күнүттэн 40-тан тахса араас социальнай босуобуйа уонна төлөбүр 2025 с. инфляцияны батыһа 5,6%-нан үрдээтэ. Үрдээһин “автоматом” буолла, ханна эрэ тиийэр, сайабылыанньаны суруйар наадата суох.
ЭКыым.Румиэ ити күнтэн бастакы оҕоҕо бэриллэр федеральнай ийэ хапытаала 728,9 тыһ. солк., оттон иккис оҕоҕо – 963,8 тыһ. солк. (өскөтүн урут бастакы оҕоҕутугар анаммыты ылбатах буоллаххытына) буолла. Аны туран, урут ийэ хапытаалын сороҕун туттубут, оттон сэртипикээккитигэр тобох харчы хаалбыт буоллаҕына, ол эмиэ үрдүөҕэ. Оҕо төрөөтөҕүнэ эбэтэр иитэ ыллаххына көрүллэр биир кэмнээх көмө босуобуйа суумата эмиэ улаатан, 28 451 солк. тэҥнэстэ. Арассыыйа уонна Сэбиэскэй Сойуус Дьоруойдара, Албан аат уордьан толору кавалердара 100-тэн тахсалыы тыһыынча солк. ылар буолуохтара.
Кирэдьиит уонна ипотека. Бу сыл тохсунньутугар диэри дьиэ кэргэн ипотекатын ыал дьон тус туһунан ылыахтарын сөбө. Холобур, эрэ биир ипотеканы, ойоҕо – иккиһи. Олунньу 1 күнүттэн ол тохтоото – дьиэ кэргэн ипотекатын дьиэ кэргэн биир эрэ бэрэстэбиитэлигэр бэриллэр буолла. Онтун ааһан, холобур, эрэ оннук кирэдьиити ыллаҕына, ойоҕо кирэдьиит дуогабарыгар булгуччу “созаемщик” быһыытынан суруллар гыннылар.
Аны туран, эмиэ олунньу 1 күнүттэн саҕалаан “Уһук Илиннээҕи уонна Арктикатааҕы ипотека” бырагыраамаҕа уларыйыы киирдэ. Мантан антах кыбартыыраны-дьиэни дьиҥ-чахчы тутан таһаарбыт тэрилтэттэн (застройщиктан бэйэтиттэн) эрэ атыылаһар көҥүллэнэр буолла.
СФР Саха сиринээҕи отделениетын пресс-сулууспатын хаартыската.
