Саха сиригэр суут борокуратуура ирдэбилин бигэргэтэн, барыта 100 мөлүйүөн солкуобайтан тахса сыаналаах аҕыс киилэ көмүһү судаарыстыба туһатыгар биэрэри көҥүллээтэ.
Өймөкөөн улууһун борокуратуурата СӨ баайын-дуолун судаарыстыбаннай харалтатыгар (хранилищетыгар) ааспыт үйэ 90-с сылларыттан кимиэнэ да буолара биллибэт аҕыс киилэ кыһыл көмүс харалла сытарын быһааран, суукка судаарыстыба туһатыгар биэриэххэ сөп диэн ирдэбил түһэрбит. Ол көмүс урут араас холуобунай дьыалаларга дакаастабыл буолан тутуллубут уонна күн баччатыгар диэри дьылҕата биллибэккэ сыппыт. Көмүһү 1990-с сыллартан ким да сүтүктээбэтэх, “миэнэ” диэн тиийэн кэлбэтэх.
Онон сибээстээн, суут көмүһү “иччитэ суох” диэн быһааран, дойду туһатыгар туһанары көҥүллээтэ.
Хаартыска – yakutia.kp.ru
