Арассыыйаҕа уоппуска төлөбүрүн орочуота уларыйда. Мантан антах ааспыт 12 ыйдааҕы орто хамнаһы ааҕарга үлэһит сыл устата ылбыт төлөбүрүн бары көрүҥэ учуоттанар буолла. Ол туһунан Судаарыстыбаннай Дуума Үлэҕэ уонна социальнай бэлиитикэҕэ кэмитиэтин чилиэнэ Екатерина Стенякина этиитигэр сигэнэн, ТАСС иһитиннэрэр.
Дьокутаат этэринэн, былырыын күһүҥҥүттэн тэрилтэлэр (үлэ биэрээччилэр) сокуон “быыһын-хайаҕаһын” сатаан туһаммат буолбуттар. Холобур, урут сорох тэрилтэлэр үлэһиккэ бэриллэр кэккэ төлөбүрү бириэмийэ быһыытынан буолбакка, докумуоҥҥа “биһирэбил-хайҕабыт” (поощрение) диэн бэлиэтээн ыыталлара. Ол түмүгэр үлэһит ылбыт “биһирэбил” харчыта орто хамнаһы ааҕарга учуоттаммат этэ, онон уоппускатын харчытын суумата кыччыыра.
“Саҥа уларыйыы 2-с пуунугар сурулларынан, билигин үлэһит үлэ биэрээччиттэн ылар бары төлөбүрэ орто хамнаһы ааҕарга учуоттанар буолла. 2007 с. оҥоһуллубут урукку докумуоҥҥа оннук суоҕа”, – диэн дьокутаат кэпсиир.
