1942 с. археологтар Италияҕа хайа хаспаҕыттан 28 тыһ. сыл анараа өттүгэр өлбүт киһи уҥуоҕун кырамтатын булбуттара. Элбэх сыл ааспытын кэннэ сиһилии чинчийии көрдөрбүтүнэн, бу уҥуох “хаһаайына” баара-суоҕа 14–17 саастаах эдэркээн киһи эбит. Аны, кини уҥуоҕар улахан адьырҕа кыыл (эһэ) ытырбыт, тырыта тыыппыт суоллара бааллар.
Эһэ убахтаабытын кэннэ уол тута өлбөтөх, төһө да киһи өрүттүбэт ыар эчэйиитин ылбытын, сыҥааҕын, саннын уҥуохтара кумаламмытын иһин, кини балай эмэ эриһэ сытан баран өлбүт. Бука, чугас дьоно көрөн-харайан олоҕун арыый уһаттахтара буолуо...
Уол олус мааныланан хараллыбытын иһин, археологтар кинини усулуобунайдык “Принц” диэн аатынан докумуоҥҥа киллэрбиттэр. Уол өлүгүн дьоно аалай соһо кыһыл олбоххо сытыарбыттар, төбөтүгэр муора раковинатынан уонна таба тииһинэн симэммит бастыҥа кэтэрдибиттэр, чокуур быһаҕы туттарбыттар, бааһырбыт сирдэригэр араҕас соһо тааһы кэккэлэппиттэр.
