Саха сиригэр тулаайах уонна төрөппүт көрүүтэ-истиитэ суох хаалбыт оҕо ахсаана сыллата аҕыйаан иһэр. Ол туһунан “Якутия24” ханаалга “Актуальное интервью” кэмигэр СӨ үлэҕэ уонна социальнай сайдыыга миниистирин солбуйааччы Елена Теплякова кэпсээтэ.
Миниистир солбуйааччыта этэринэн, бүгүҥҥү туругунан өрөспүүбүлүкэбитигэр тулаайах уонна төрөппүт көрүүтэ-истиитэ суох 3 131 оҕо баар. Сыл анараа өттүгэр 3 453 эбитэ үһү. Онон ааспыт сыл иһигэр 322 оҕону амарах сүрэхтээх дьон иитэ ылбыттар. Оттон ааспыт биэс сыл иһигэр итинник дьылҕалаах оҕо ахсаана 30%-нан, ол эбэтэр 1 331 оҕонон, аҕыйаабыт.
Теплякова ахтан ааспытынан, өссө 2023 сыллаахха өрөспүүбүлүкэ Ил Дархана Айсен Николаев 2029 сылга диэри оҕо дьиэлэригэр олорор оҕолор ахсааннарын үс төгүл аҕыйатарга сорудахтаабыт. Ааспыт икки сыл иһигэр тулаайах уонна төрөппүт көрүүтэ суох хаалбыт оҕо ахсаана 1,4 төгүл аҕыйаабыт.
Бүгүҥҥү туругунан, анал дьиэлэргэ 319 оҕо олорор. Ол сүрүннээн улаатан эрэр обургу (подросток), доруобуйаларыгар кэккэ хааччахтаах уонна элбэх буолан бииргэ төрөөбүт оҕолор (элбэх оҕону биирдэ иитэ ылар дьиэ кэргэн дэбигис көстүбэтинэн).
Оҕону иитэ ылыан баҕалаах дьон олорор сирдэригэр эпиэкэ тэрилтэтигэр тиийэн сайабылыанньа суруйуохтарын, ирдэнэр докумуоннары хомуйуохтарын уонна “кииринньэҥ төрөппүт” оскуолатыгар босхо үөрэниэхтэрин сөп. Эпиэкэ исписэлиистэрэ хандьыдааттар олорор усулуобуйаларын, оҕону тоҕо ылыахтарын баҕаралларын үөрэтэллэр уонна 10 күн иһигэр “иитэ биэриэххэ сөп” эбэтэр “суох” диэн быһаарыы таһаараллар. Ол көҥүл икки сыл болдьохтоох.
Оҕону иитэ ылар төрөппүттэргэ хас уонна хастыы саастаах оҕолору ылбыттарыттан көрөн төлөбүр бэриллэр.
Хаартыска: Yakutia24.ru
