Ааспыт нэдиэлэ устатыгар түөкүттэр Саха сирин олохтоохторуттан барыта 8 672 943 солкуобайы уорбуттарын туһунан өрөспүүбүлүкэ борокуратуурата суруйар.
Ол курдук, “инвестициянан” манчыыктаан түөрт киһиттэн 7 мөлүйүөнтэн тахса солкуобайы “олордон” ылбыттар. Ол иһигэр икки биэнсийэлээхтэн, биир лабараантан уонна бэйэ дьарыктаах киһиттэн.
Ону таһынан, интэриниэт маҕаһыын атыыһыта буолан кубулунан биир түөкүн устудьуон уолтан 115 850 солк уорбут. “Госуслуги” уонна ФСБ “үлэһиттэрэ” пиццерия асчытыттан 415 793 солк. сойбоппуттар. Биир урбаанньыт төлөпүөн сыһыарыытын хачайдыыбын диэн 183 725 солк. “сүтэрбит”. Буҕаалтыр киһи интэриниэттэн анал-тиэхиньикэ атыылаһаары 719 910 солк. ытыһын соттубут. Итини сэргэ биир оробуочай валюта атастаһабын диэн 175 000 солк. уордарбыт.
Сэрэхтээх буолуҥ.
Хартыыҥка: my-evp.ru/
