Бу күннэргэ өрөспүүбүлүкэ кэккэ улуустарыгар халлаан күүскэ сылыйаары турар. Холобур, Ленскэйгэ уонна Өлүөхүмэҕэ инньэ 0 кыраадыс буолуо дииллэр. Халлаан хаһан, хайдах сылыйарын Гидрометкиин үлэһитэ Саргылаана Никитина кэпсиир.
Нэдиэлэ ортотугар халлаан сылыйыаҕа. Ол иннинэ “кыһын тиһэх кыланыытын” курдук, киин улуустарга тымныйан ылыаҕа.
“Бу нэдиэлэҕэ Красноярскай кыраайтан хаста да төхтүрүйэн циклон кэлиэҕэ, онон халлаан тэмпэрэтиирэтэ халбаҥныаҕа.
Холобур, бу күннэргэ тымныы салгын балаһата кэлэн, киин улуустарга -35...-40, сорох сирдэргэ -42...-47 буола сылдьыаҕа, нэһилиэнньэлээх пууннарга туманнырыа.
Арҕааҥҥы, соҕуруулуу-арҕааҥҥы, ол кэннэ киин улуустарга бээтинсэттэн саҕалаан дьэ сылыйыаҕа. Ол гынан баран, сөкүүндэҕэ 9—14 миэтэрэ түргэннээх тыаллаах буолуо. Тэмпэрэтиирэ күнүһүн -10...-15 кыраадыска тиийэ үрдүө, оттон соҕуруулуу-арҕаа 0 буолуо. Дьокуускай куоракка ити күннэргэ -16...-18 буолара күүтүллэр, хаардыаҕа”, – диир эспиэр.
Хартыыҥка: Yakutia24.ru
