“Национальная Лотерея” диэн РФ Үп министиэристибэтэ иилээн-саҕалаан ыытар судаарыстыбаннай латарыайатын тэрийээччилэрэ Саха сиригэр олорор, “Мечталлион” диэн латарыайаҕа 1 мөлүйүөн солкуобайы сүүйбүт Саха сирин олохтооҕун көрдүүллэр.
Бааттаах киһи латарыайаны бэрт соторутааҕыта Нерюнгри Чульманын почтатыттан атыыласпыт эрээри, харчытын баччааҥҥа диэри ыла илик, онон кини аата-суола биллэ илик үһү.
“Мечталлион” латарыайа 178-с №-дээх тираһа ааспыт өрөбүлгэ, олунньу 15 күнүгэр, оонньоммут.
“Саха Өрөспүүбүлүкэтин олохтоохторо, чуолаан чульманнар, атыыласпыт билиэттэргитин болҕойон көрүҥ. Сороҕор дьон билиэти атыылаһан баран умнан кэбиһээччи”, – диэн латарыайа пресс-сулууспата суруйар.
Билиэт харчыны сүүйбүтүн-суоҕун кэннигэр баар куар-кодунан эбэтэр сурулла сылдьар штрих-кодунан анал саайка киирэн бэрэбиэркэлиэххэ сөп.
Хаартыска: lotomir.ru
