Бу сыл балаҕан ыйыттан Арассыыйа оскуолаларыгар 10–11-с кылаас үөрэнээччилэригэр “Обучение служением. Первые” булгуччулаах саҥа куурус киирэрэ былааннанар. Ол туһунан РФ үөрэҕин миниистирэ Сергей Кравцов “РБК” ханаалга кэпсээбит.
Тойон Кравцов сырдаппытынан, саҥа биридимиэт улаатан эрэр оҕо гражданскай эппиэтинэһин үрдэтэргэ көмөлөһүөхтээх. Оҕолор түөрүйэни сэргэ уопсастыбаҕа туһалаах үлэни-хамнаһы дьүөрэлээн үөрэниэхтэрэ үһү. Көхтөөхтүк үөрэммит оҕолор СКЭ-лэригэр эбии баал суруллуохтаах.
Итини таһынан, бу күһүҥҥүттэн сыыйа-баайа “Духовно-нравственная культура России” (ДНКР) диэн сиэргэ-майгыга үөрэтэр биридимиэт киириэхтээх. Суруйалларынан, 2026/27 үөрэх дьылыгар биридимиэти 5-с кылаастар, оттон 2027/28 үөрэх дьылыттан 6-с уонна 7-с кылаастар үөрэтиэхтээхтэр.
“Биһиги курдук 130-тан тахса араас омук олорор өрөспүүбүлүкэтигэр биридимиэт ураты суолталаах. Саха сиригэр омуктар хардарыта өйөһөн-өйдөһөн, култуураларын ытыктаһан олоруулара – күннээҕи олохпут көстүүтэ. Онон ДНКР “Разговоры о важном”, “Семьяведение” курдук биридимиэттэри ситэрэн-хоторон биэриэхтээх”, – диэн С.Н. Донской-II аат. ИРОПК дириэктэрин эбээһинэһин толорооччу Юрий Шишигин этэр.
Даҕатан эттэххэ, быйыл Үөрэх министиэристибэтэ иһитиннэрбитинэн, балаҕан ыйын 1 күнүттэн 5-с кылааска омук тылын үөрэҕэ үс чаастан икки чаас буолуохтаах. 2027 с. оннук уларыйыы 6-с уонна 7-с кылаастарга киириэхтээх.
Хаартыска: id.pervye.ru
