Марат Никандров диэн 19 саастаах эдэр киһи 2023 с. ахсынньытыгар бэйэтэ аһара баҕаран, дьулуһан туран, “дьээбэҕэ” диэн (по приколу) иноагент статуһун ылбыт.
Бастаан утаа онно туох да төрүөт суох буолан, кинини төттөрү үүрэн ыыта сатаабыттар эрээри, үөннээх эдэр киһи Юстиция министиэристибэтигэр 5 төгүл дьаныһан туран “АХШ бэрэсидьиэнэ Джо Байдены уонна Украина бэрэсидьиэнэ В.Зеленскэйи наһаа ытыктыыбын, кинилэр сабыдыалларыгар сылдьабын...” диэн суруйбут. Ол баҕа санаата туолбут, кинини “иноагент” диэн статустаабыттар.
Бу кэнниттэн Марат Никандров хаста да административнай дьыалаҕа эриллибит, ыстарааптаммыт. “Иноагент” статустаммыт киһи хас кыбаартал аайы Минюстка туох эрэ отчуотун ыытыахтаах эбит, Марат ону толорбокко хаста да сууттаммытын кэннэ, быйыл олунньу 12 күнүгэр кинини утары холуобунай дьыаланы көбүттүлэр. Буруйдааҕа дакаастанар түбэлтэтигэр, кини 2 сылга хаайыыга түбэһиэн сөп.
Марат билигин “таах сибиэ оонньооччу буоламмын” диэн ытыыр, муҥатыйар сураҕа иһиллэр.
Хаартыска – msk1.ru
