Арассыыйаҕа аан бастакы анал сертификацияны ааспыт сылгы этин Саха сиригэр оҥороллор. Ону туоһулуур докумуону бу күннэргэ Горнай Маҕараһыттан төрүттээх урбаанньыт Вера Лиханова тутта. Ол туһунан Тыа хаһаайыстыбатын министиэристибэтэ иһитиннэрэр.
Сэртипикээти “Роскачество-Органик” диэн аккредитацияны ааспыт тэрилтэтэ биэрбит. “Органическай” диэн ааттаах эт айылҕаттан ыраас, туох даҕаны эми-тому, ГМО-ну, синтиэтикэ аһылыгы туһаммакка идэһэлэммит диэн суолталаах.
Вера Лиханова кэпсээбитинэн, ити сэртипикээт бэтэринээр-саньытаар бэрэбиэркэтин түмүгүнэн бэриллэр ыспыраапкаттан чыҥха атын, кытаанах ирдэбиллээх эбит.
“Сырье айылҕаттан ырааһын дакаастыахтааххын. Ол курдук, сүөһү-сылгы мэччийэр сиригэр биэс сыл устата оту-маһы эмтиир ханнык даҕаны сириэстибэ туттуллубатаҕын дакаастыахтааххын. Биһиги вет-сулууспаттан, лесхозтан уонна да атын инстанциялартан ыспыраапка бөҕөнү хомуйбуппут. Сылгыгар тугу аһатаргын, уулатаргын, хайдах эмтииргин-томтуургун – бука барытын көрдөрөҕүн”, – диэн хаһаайыстыба хотуна кэпсиир.
В.Лиханова эппитинэн, бэл диэтэр сылгыларыгар сиэтэр отугар 141 араас пестицид баарыгар-суоҕар бэрэбиэркэлээбиттэр. Аны туран, идэһэлээбит кэннэ бородууксуйаны бэйэтин Москубаҕа анаалыска ыытан көрдөрбүттэр. Уопсайынан, бородууксуйа “Органическай” диэн ааттанарын туһугар сөҕүмэр үлэ ыытыллыбыт.
“Бүтүн Арассыыйа үрдүнэн эт салаатыгар бу аан бастакы холобур буолла”, – диэн СӨ Ас-үөл технологиятын киинин салайааччыта Айаал Тимофеев этэр.
Санаттахха, 2014 сыл балаҕан ыйын 1 күнүттэн Арассыыйаҕа аһылык маркировкатын ирдэбилэ кытааппыта. Онон “эко” эбэтэр “био” диэн дьаралыктары сертификацияны ааспыт эрэ бородуукталар ылар буолбуттара.
Хаартыска – yakutia.info
