Элбэх оҕолоох үлэлиир ийэлэргэ уонна аҕаларга көрүллэр анал чэпчэтиилэр РФ Үлэ кодексынан мэктиэлэнэллэр. Ол барыта дьиэ кэргэн үлэлии-үлэлии оҕотун иитэригэр, бириэмэтин, сынньалаҥын сөпкө аттарынарыгар туһалыыр.
“18-гар диэри саастаах, үстэн элбэх оҕолоох төрөппүттэргэ сыллааҕы төлөнөр уоппуска кинилэргэ табыгастаах кэмҥэ бэриллиэхтээх (кыра оҕолоро 14 сааһын туолуор диэри). Ону таһынан, 14-гэр диэри икки эбэтэр онтон элбэх оҕолоох дьоҥҥо, кэлэктиип дуогабарыгар суруллубут буоллаҕына, сүрүн уоппускаларын таһынан төлөбүрэ суох эбии 14 күннээх уоппуска бэриллиэн сөп. Эмиэ кинилэргэ табыгастаах кэмҥэ”, – диэн СӨ үлэҕэ уонна социальнай сайдыыга министиэристибэтэ иһитиннэрэр.
Аны туран, 18-гар диэри саастаах үстэн элбэх оҕолоох үлэһиттэри үлэһит суругунан сөбүлэҥэ суох командировкаҕа ыытар, үлэни таһынан үлэлэтэр, түүҥҥү симиэнэҕэ эбэтэр өрөбүлгэ дьуһуурустубаҕа таһаарар көҥүллэммэт. Оннук этии киирдэҕинэ, кинилэр РФ үлэҕэ кодексын 96-с, 99-с, 259-с уонна 261-с ыстатыйатыгар сигэнэн батыныахтарын сөп.
Хаартыска – Yakutia24.ru
