Баклан диэн уу көтөрө Арассыыйа үгүс эйэрэгийиэнин буулаан, төбө ыарыыта буолбута ыраатта. Бу туохха да топпот моҕус кыыл булт быһыытынан ханна да сыаналаммат. Ол гынан баран, өлгөмнүк төрүүр-ууһуур, балык хаһаайыстыбатыгар улахан хоромньуну таһаарар. Саха сиригэр эмиэ биллэр буолла.
Ил Түмэҥҥэ буолбут бырабыыталыстыба чааһыгар дьокутааттар СӨ Экологияҕа миниистирин солбуйааччы Николай Додоховтан бакланы уодьуганныырга тугу гыныахха сөбүн ыйыттылар.
“Бакланы ытыахха наада. Кини кыыл-сүөл эбийиэгэ (объект животного мира) диэҥҥэ киирсэр эрээри, булт ресурсата буолбатах. Уопсайынан, СӨ Экологияҕа министиэристибэтигэр тиийэн бакланы ытарга көҥүл ылыахха сөп”, – диэн Николай Додохов хоруйдаата.
Санатар эбит буоллахха, Саха сиригэр баклан уйатын аан бастаан 2018 с. Сунтаар улууһун Хоро бөһүөлэгин таһыгар булбуттара. Ону олохтоох дьон урусхаллаабыттара. Кэлин моҕус кыыллар Алдаҥҥа, Ленскэйгэ, Ньурбаҕа, Өлүөхүмэҕэ уонна Кэбээйигэ биллибиттэрэ. Баклан 1,5 киилэлээх балыгы тааҕы-таах биирдэ ыйыстан кэбиһиэн сөп. Кини иигэ-сааҕа оту-маһы бүтүннүү быһа сиир, ол кэннэ онно туох да үүммэт буолар.
Хаартыска – IRK.ru
Кыым.Ру
