Саха сиригэр сааскы халааҥҥа бэлэмнэнэр үлэ саҕаламмыта балачча буолла. Быйыл “өрүстэргэ харыы тахсар түгэнигэр дэлби тэптэрэргэ” диэн 25 туонна дэлби тэбэр бэссэстибэни хаһааннылар. Онон анал идэлээх дьон дьарыктаныа. Ураты болҕомтону уу таһымын кэтииргэ ууруохтара. Муус ааһар кэмигэр 206 гидрология поһа үлэлиэ, ол иһигэр мэлдьи үлэлээччилэр уонна быстах кэмнээхтэр.
Уопсайынан, халааҥҥа бэлэмнэнэргэ барыта 183,7 мөлүйүөн солкуобай көрүллүбүт. Онтон 69 мөлүйүөнэ – федеральнай бүддьүөттэн кэлбит харчы.
Былырыын көмүөл уонна халаан хайдах ааспытын учуоттааннар, бу саас сэрэтэр үлэ “куттааллаах” дэнэр 92 учаастакка ыытыллыаҕа (былырыын 80 этэ). “Суһал быһаарыныыларга” диэн 236 мөлүйүөн солкуобайы эрэсиэрбэҕэ бэлэмнээбиттэр. Ону тэҥэ 150 мөлүйүөн солкуобайы ыксаллаах быһыы-майгы үөскүүр түгэнигэр туттарга уурбуттар.
Өрөспүүбүлүкэ үрдүнэн халаан кэмигэр 17 тыһыынча киһи, 3,5 тыһыынча тиэхиньикэ, 27 көтөр аал уонна 526 устар сириэстибэ үлэлииргэ бэлэм буолбут.
Гидромет-киин Саха сиринээҕи салаата иһитиннэрэринэн, быйыл өрөспүүбүлүкэ өрүстэрэ уруккуттан 3—5 күн урутаан-хойутаан кэмигэр эстиэхтэрэ. Уу таһыма Дьааҥыга, Халымаҕа, Алаһыайга, Индигииргэ, Мархаҕа уонна Майдаҕа үрдүүрэ күүтүллэр. Аммаҕа уонна Анаабырга нуорматтан кыра уу кэлиэн сөп. Онтон атын өрүстэр хааларыттан тахсаллара сылыктаммат.
Саха сирин киин, илин энээр улуустарын үрэхтэригэр орто таһымнаах уу кэлиэ эбэтэр ортону аннынан буолуоҕа. Исписэлиистэр этэллэринэн, улахан өрүстэр кыралаан харыахтара. Ол гынан баран, балаһыанньа уларыйыан да сөп. Муус ордук маннык өрүстэргэ харара сылыктанар: Өлүөнэ өрүскэ – Хаҥалас улууһуттан саҕалаан Алдан төрдүгэр диэри; Алдан өрүскэ – Уус Майда таһыгар; Халыма өрүскэ – Үөһээ уонна Орто халымалар туһаайыыларынан. Муус харара-суоҕа ыам ыйынааҕы күнтэн-дьылтан тутулуктаах буолуоҕа.
Кэлиҥҥи сыллардааҕы гидрология услуобуйатын учуоттаатахха, өрүстэр эстиилэрин бүтэһиктээх билгэтэ муус устар 16 күнүгэр тахсыаҕа.
