Муус устар 6 күнүттэн саҕаламмыт Бүтүн Арассыыйа үрдүнэн ыытыллар чэпчэтиилээх сурутуу күннэрин чэрчитинэн "Кыым" норуот хаһыата көҕүлээбит "Хаһыакка сурутуута бэлэхтээ – төрөөбүт тылгын харыстаа!" аахсыйата салҕанар.
Үтүө санааланыы аахсыйатын чэрчитинэн ким баҕалаах, үтүө сүрэхтээх, төрөөбүт төрүт тылын харыстыырга дьулуһар киһи норуот духуобунай баайын, ийэ тылын, төрүт үгэһин уонна итэҕэлин харааннааччы "Кыым" хаһыаты бэтэрээннэргэ, доруобуйаларыгар хааччахтаах, элбэх оҕолоох, соҕотоҕун олорор дьоҥҥо сурутан бастыҥ бэлэҕи оҥоруон эбэтэр бу аахсыйа туһунан билэр дьонугар кэпсиэн сөп.
Холобур, бу аахсыйаҕа кыттыһан КРДВ кэлэктиибэ Капитоновкатааҕы интэринээт дьиэ олохтоохторугар уонча хаһыаты сурутан бэлэхтээбитэ. Ол туһунан манна ааҕыаххытын сөп: https://kyym.ru/kyym-khahyat/14646-yakutiya-ust-kyrda-astarga-uonna-inbeliitterge-sergekh-bele-e
Оттон бүгүн "Хаһыакка сурутуута бэлэхтээ – төрөөбүт тылгын харыстаа!" аахсыйаҕа СӨ Бырабыыталыстыбатын бэрэссэдээтэлин солбуйааччыта Анатолий Аскалонович Семенов кыттыста!
"Бүгүн бэйэбит төрөөбүт тылбытын харыстыырга анаммыт аахсыйаҕа улаханнык өрө көтөҕүллэн туран кыттыстым. Ким баҕалаах, ким кыахтаах бу үтүө ис хоһоонноох аахсыйаҕа кыттыҥ, төрөөбүт тылбыт, сурукпут-бичикпит сүппэт-симэлийбэт кэскилин түстэһиҥ!" – диэн Анатолий Аскалонович ыҥырда.
Ытыктабыллаах бар дьоммут, ааҕааччыларбыт, сахалыы тыллаах блогердар!
Төрөөбүт тылбытын харыстыыр, ыччакка чөл тиэрдэр – барыбыт соруга. Аахсыйаҕа кыттыҥ, үтүө дьыаланы оҥоруҥ, төрөөбүт тылгытын харыстаһыҥ.
Аахсыйаҕа кыттыы уонна устуу боппуруоһунан: 89681506715 (Ирина)
Үтүө дьыаланы бииргэ оҥоруох, төрөөбүт тылбытын харыстыах!
