Бу күннэргэ бырабыыталыстыба бэрэссэдээтэлин бастакы солбуйааччыта Дмитрий Садовников Аммаҕа бара сылдьан улуус халааҥҥа төһө бэлэмин көрдө-иһиттэ. Бу күннэрдээҕи барыллаан билгэ быһыытынан, Өлүөнэ, Алдан, Амма уонна Бүлүү өрүстэр ыам ыйын бастакы-иккис уон күннэригэр эстиэхтэрин сөп. “Бэлэмнэнэ охсорго бэрт кылгас кэм хаалла, олорон хаалар табыллыбат”, – диир Садовников.
Кини этэринэн, Амма уруты хонтуруолга турар. Тоҕо диэтэххэ, сааскы халаан манна алта бөһүөлэги таарыйыан сөп. Онно барыта 832 киһи, ол иһигэр 243 оҕо, олорор. Улууска “уу кэлэр түгэнигэр” диэн үөрэх ыытыллыбыт, ол гынан баран, бастакы вице-премьер бэлиэтээбитинэн, хас да анал уонна кутуу быһыт туруктара бэрдэ суох буолан, куттал үөскээн турар. Онон быстах кэмнээх гидропостары туруорбуттар, кэккэ учаастактарга мууһу кэбирэтэ сылдьаллар. “Тохтоло суох хаардыы турар буолан үлэ-хамнас арыый бытаарда. Ол гынан баран, муус устар ортотугар диэри үлэ барыта бүтүөхтээх. Улуус дьаһалтата суһал ыстаабы уонна ыксаллаах быһыыга-майгыга тугу гынар былааны бигэргэттэ, дьоҥҥо өйдөбүнньүк суруктары туттара сылдьаллар”, – диир Садовников.
Сүөһү-ас көмүскэлигэр туспа болҕомто ууруллубут. 104 киһилээх анал быыһыыр сулууспа тэриллибит, барыта 305 ынах сүөһүнү уонна 567 сылгыны быстах хорҕотор 12 пуун бэлэмнэммит.
Уопсайынан, Саха сиригэр “сэрэхтээх” дэнэр түөлбэҕэ 121 нэһилиэнньэлээх пуун киирэн турар. Онно барыта 24 тыһыынча кэриҥэ киһи олорор. Бу саас халааны көрсөргө 17 тыһыынча исписэлиис, 3 400 тиэхиньикэ, хас даҕаны сөмөлүөт-бөртөлүөт уонна устар тэрил, 303 хорҕойор пуун бэлэм буолбут.
“Күүскэ бэлэмнэнэбит. Хас биирдиибит дьиссипилиинэлээх уонна эппиэтинэстээх буолуохтаах. Халаан биһиги бэлэммитин-суоҕун ыйыппат. Онон тэрээһиннээхтик, уолуйбакка көрсүөххэ наада. Бииргэ туруннахпытына – кыайыахпыт”, – диэн туран Дмитрий Садовников сырыытын түмүктээтэ.
