Бүгүҥҥүттэн, муус устар 14 күнүттэн, Хатас – Павловскай хайысханан Өлүөнэни туоруур муус суолга 20 туоннаҕа диэри хааччахтааһын киирдэ. Суол барыллаан муус устар 15 күнүгэр сабыллыан сөп эрээри, күн-дьыл уонна муус туругуттан көрөн 17 чыыһылаҕа диэри уһатан биэриэхтэрин сөп. Ол туһунан СӨ көлөҕө миниистирэ Владимир Сивцев кэпсээтэ.
Миниистир этэринэн, төһө даҕаны муус устар 10 күнүттэн 20 туоннаҕа диэри хааччахтааһыннар киирдэллэр, бу күннээҕи туругунан, өрөспүүбүлүкэ кыһыҥҥы айан суоллара үгүстэрэ үлэлии тураллар. 20 чыыһылаҕа диэри биир-биир сабыллыахтаахтар.
Хоту улуустарга баар муус суоллар эмиэ бары кэриэтэ аһаҕастар. Арай Баатаҕай – Саккырыыр хайысханан уустук балаһыанньа үөскээбит. Ити эҥээр тыын суолталаах таһаҕас өссө да тиэллэн бүтэ илик эбит. Онон сибээстээн, “Дороги Арктика” тэрилтэ таһаҕасчыттарга түүннэри-күнүстэри көмөлөһөр.
“Муус уйугун хааччаҕын булгуччу тутуһуҥ. Суол сабылынна да, мууска тахсар көҥүллэммэт”, – диэн миниистир сэрэтэр.
