Саха сирэ утуйа сыттаҕына Аан дойдуга буолбут сурахтар уонна түбэлтэлэр
Муус устар 14 күнүгэр «Форекс» ырыынагар дуоллар кууруһа 75 солкуобайтан аллара түстэ, күн ортото кини сыаната 74,7 солкуобайга тиийэ сырытта. Холобур: кулун тутарга дуоллар 80 солкуобайтан тахса этэ, оттон ый ортотугар 86 солкуобайга дылы тахсыбыта. Арассыыйа киин баана ол күн дуоллар кууруһун 76,25 солкуобайга диэри түһэрдэ. Чинчийээччилэр солкуобайы өйүүр күүс мөлтүөн сөбүн уонна кэлин дуоллар сыаната эмиэ үрдүөн сөбүн сэрэтэллэр.
Игорь Самохвалов/«Парламентская газета»
УЕФА Чөмпүйүөннэр лиигэлэрин төрдүс финал түмүгүнэн «Атлетико» «Барселонаҕа» 1:2 ахсаанынан хоттордо. Бастакы түһүмэххэ каталонецтартан Ламин Ямаль уонна Ферран Торрес бэлиэтэннилэр, мадридтартан Адемола Лукман оонньуута табылынна. Икки оонньуу түмүгүнэн (3:2) «Атлетико» мадридтааҕы хамаанда финал аҥаарыгар таҕыста. «ПСЖ» тас куоракка «Ливерпуль» хамаанданы 2:0 ахсаанынан хотто, оттон Арассыыйа голкипера Матвей Сафонов бэйэтин мөлтөх соҕустук көрдөрдө.
Хаартыска: Reuters
Сибээс хампаанньалара (оператордар) Арассыыйа олохтоохторун VPN холбонон сылдьарын туһунан сэрэтэн саҕалаатылар. МТС-тан VPN холбуурга кыһалҕа үөскүөн сөбүн туһунан биллэрэр, оттон «Мегафон» уонна «Билайн» таба үлэлииригэр VPN-ы араарарга сүбэлииллэр. Ozon уонна «Яндекс Пэй» VPN-наах киирэргэ хааччах туруорбуттар. «Тохтоо, VPN холбонон турар, оннук киирэр сатаммат. Бу регулятор ирдэбилэ», — диэн «Яндекс» төлөбүр сулууспата иһитиннэрэр.
Кытайга биир эр киһи 20 сыл устата ртуттаах термометры очоҕоһугар илдьэ сылдьыбыт, диэн South China Morning Post суруйар. 32 саастаах киһи иһэ ыалдьан балыыһаҕа тиийэн, иһигэр туох буола турарын билэн баран соһуйбут. Термометры кыра сылдьан сыыһа-халты туттан ыйыстан кэбиспит уонна куттанан төрөппүттэригэр эппэтэх. Термометры очоҕостон этэҥҥэ хостообуттар.
Самаара уобалаһыгар икки хаайыыга бастакы робот-патрульнай үлэтин саҕалаата. Тэрил бэйэтэ суолун булан айанныыр, кэһиини бэлиэтиир уонна оперативнай ситим киинигэр иһитиннэрэр. Бу робот куһаҕан халлааны куһаҕан диэбэккэ үлэлиир кыахтаах. Барыл үлэни судургутарга ананар.
Москубаҕа WhereToEat International бириэмийэни туттарыы сиэрэ-туома буолла. Түмүк ресторатордар, асчыттар уонна гастрономия суруналыыстарын кистэлэҥ куоластааһыннарынан таҕыста. Сыл бастыҥ ресторанынан Санкт-Петербургтааҕы BoBo буолла, иккис миэстэҕэ — Москубатааҕы Olluco, үһүс — Frantsuza Bistrot. Ону таһынан Savva, Sage, Carniceria Vino, Maya, Tunguska, Auyl уонна «Умай» бастыҥ уонугар киирдилэр.
Канье Уэсты Chateau Marmont отельга киһиэхэ саба түспүтүн иһин суукка биэрдилэр. Ырыаһыты кырбаабытын иһин уонна моральнай хоромньуга буруйдууллар. Ирдээччи этэринэн, Уэст кинини сутуругунан сирэйгэ охсубут уонна тохтооботох. Рэпер бу иннинэ кэргэнин туһуттан урбаанньыт бырааттыылары кытары охсуһа сылдьыбыттаах.
Аргентинаҕа Диего Марадона өлүүтүн дьыалата саҥа ырытыллан саҕаланна. Прокурор этиитинэн, футболистка наадалаах көрүү-истии олохтонуллубатах. Буруйдуур өрүт этиитинэн, дьиэҕэ сытан эмтэнии «араастаан эрэйдиир, тиэрэ дьайыылаах» этэ. Аҕыс быраас 8-тан 25 сылга дылы хаайыыга барыахтарын сөп.
Бэй.кэр.
Хаартыска: Мария Васильева/ЯСИА
