Өймөкөөн улууһугар мобильнай ситим уонна интэриниэт саҥа нэһилиэктэргэ тиийдэ.
Билайн хампаанньа Өймөкөөн улууһун Хара-Тумул уонна Биэрэк Үрдэ нэһилиэктэригэр мобильнай интэриниэти киллэрдэ. Ону таһынан, Аан дойдубут саамай тымныы сирдэриттэн биирдэстэригэр — Өймөкөөҥҥө — барар суол 8 килэмиэтирин 4G ситиминэн хааччыйда.
Үлэһиттэр Өймөкөөҥҥө баар базовай станцияны саҥардан, интернет «тиийэр кыаҕын» улаатыннардылар. Ол түмүгэр 300-чэ киһи олорор Хара-Тумул уонна Биэрэк Үрдэ нэһилиэктэригэр мобильнай интэриниэт урут суох эбит буоллаҕына, билигин түргэн тэтимнээх интэриниэт үлэлиир буолла. Билайн аан бастакынан ситими тарта.
Билигин олохтоохтор социальнай ситимҥэ хаартыскаларын тарҕатар, мессенджер нөҥүө видео-уонна куолас суруктары ыытар, ону таһынан онлайн-харчы эргиирин туһанар уонна судаарыстыбаннай өҥөлөрү ыраах сиргэ — Дьокуускайга эбэтэр улуус киинигэр тиийбэккэ эрэ — ылар кыахтаннылар.
«Биир сыллааҕыта биһиги Өймөкөөҥҥө 4G ситимин киллэрбиппит. Быйыл бу ситими кэҥэтэн, өссө икки ыраах сытар нэһилиэги сибээһинэн хааччыйдыбыт. Дьон олоҕун тупсарарга, аныгы технологиялары туһаналларыгар кыах биэрэргэ үлэлиирбит биһиэхэ олус суолталаах», — диэн Билайн Саха сиринээҕи салаатын дириэктэрэ Вадим Пеньков бэлиэтиир.
Өймөкөөҥҥэ 500-чэ киһи олорор. Кинилэр үксүлэрэ таба иитиитинэн, балыктааһынынан, сүөһү иитиитинэн уонна бултааһынынан дьарыктаналлар. Бу сиргэ кыһын тымныы –50°С кыраадыстан аллара түһэр. Дьокуускайтан тыһыынча килэмиэтэр тэйиччи сытар бу нэһилиэккэ суол-иис суох. Дьыл-хонук уларыйар кэмигэр баар-суох салгын суолунан эрэ сибээстэһэр.
Бэй.кэр.
Хаартыска: Билайн пресс-сулууспата
