Муус устар 15 күнүгэр киэһээ Дьокуускай — Аллараа Бэстээх икки ардынааҕы муус суол сабыллар. Бу туһунан СӨ Тыраанспар министиэристибэтэ иһитиннэрдэ.
Ону таһынан, Өлүөнэ өрүскэ баар «Хаҥалас — Суотту» уонна Алдан өрүскэ баар «Мэҥэ-Алдан — Кэскил» муус суоллара үлэлэрин тохтотор буоллулар.
Муус устар 17 күнүгэр диэри «Хатас — Павловскай», ону тэҥэ Үөһээ Бүлүү, Ньурба (Күндээдэ) уонна Сунтаар (Сунтаар, Кириэстээх) нэһилиэктэрин аттыгар баар муус суоллары сабарга былаанныыллар. Билигин бу суолларынан 20 туоннаҕа дылы ыйааһыннаах массыыналар сылдьаллар.
Тыраанспар министиэристибэтэ бэлиэтииринэн, сир ириэнэ уонна суолга хайаҕастар, кэбирэх сирдэр үөскээбит буолан, суоппардарга «Хатас — Павловскай» суолунан сылдьыбаттарыгар сүбэлииллэр.
Бэй.кэр.
Хаартыска: Мария Васильева/ЯСИА
