Бу сыллар усталарыгар СӨ Дьарыктаах буолууга сулууспатын көмөтүнэн 850 тыһыынчаттан тахса киһи үлэ булбут. Ол туһунан биэдэмистибэ 35 сыллаах үбүлүөйүгэр анаммыт тэрээһиҥҥэ СӨ Дьарыктаах буолууга судаарыстыбаннай кэмитиэтин салайааччыта Светлана Горюшинская кэпсээтэ.
“Бу сыллар усталарын тухары өрөспүүбүлүкэ дьарыктаах буолуутун сулууспатыгар 1 мөлүйүөн 410 тыһыынча киһи сырытта. Онтон 850 тыһыынча кэриҥэ киһи, ол эбэтэр үлэ көрдөөн кэлээччи 60,3%-на, үлэ булла”, – диир хотун С.Горюшинская.
Кини этэринэн, 1991 сылтан саҕалаан 2025 сылга диэри үлэтэ суохтарга бэриллэр босуобуйа кээмэйэ 597 тыһыынча төгүл улааппыт.
1991 сыллаахха муус устарга Саха АССР үлэ министиэристибэтин иһинэн Нэһилиэнньэ дьарыктаах буолуутун кэмитиэтэ тэриллибитэ. 1992 с. “Нэһилиэнньэ дьарыктаах буолуутун” туһунан СӨ сокуона ылыныллыбыта, Дьарыктаах буолуу пуондата тэриллибитэ. Сулууспа хара тэриллиэҕиттэн күүстээх тургутууну ааспыта: 1990-с сс. уларыйыы-тэлэрийии, 1998 с. дефолт, ол кэннэ үөскээбит экэниэмикэ кириисистэрэ. Ол барыта дьарыктаах буолуу судаарыстыбаннай бырагырааманан мэктэлиэниэх тустааҕын туоһулуур.
2017 сылтан сулууспа туспа толоруулаах былаас уоргана буолбута – СӨ дьарыктаах буолууга судаарыстыбаннай кэмитиэтэ.
