Аныгы ыччат хамнас кээмэйин эрэ буолбакка, үлэ ис хоһоонун уонна табыгаһын ордук сыаналыыр буолбут. СберНПФ уонна «Работа.ру» сервистэр 2026 сыл кулун тутар ыйыгар ыыппыт чинчийиилэрэ ону таба бэлиэтиир.
Ыччат идэни талыытыгар тугу көрөрүй?
- Интэриэс (55%): Эдэр дьон бастатан туран бэйэлэрэ сөбүлүүр, интэриэһиргиир эйгэлэригэр үлэлиэхтэрин баҕараллар.
- Хамнас уонна дьоҕур (31%): Үлэ киһи айылҕаттан бэриллибит талааныгар сөп түбэһэрэ уонна табыгастаах хамнастааҕа ирдэнэр.
- Тэйиччиттэн үлэлээһин (удаленка): Хас биэс киһиттэн биирдэрэ (21%) дьиэттэн олорон үлэлиири уонна айар дьоҕурун арыйары ордорор.
Хамнас туһунан баҕа санаа: Эдэр ыччат үксэ (86%-на) ыйдааҕы дохуоттара 100 тыһыынча солкуобайтан тахса буоларын баҕарар. Көрдөрүүлэр манныктар:
- 100-150 тыһ. солк. — 29% кыттааччы;
- 150-200 тыһ. солк. — 26% кыттааччы;
- 200-300 тыһ. солк. — 26% кыттааччы;
- 300 тыһыынчаттан тахса — 5% эрэллээхтик күүтэр.
СберНПФ HR-дириэктэрэ Наталия Гончарова этэринэн, билигин үлэ биэрээччилэр хамнаһынан эрэ киһини угуйар кэмнэрэ ааспыт. Аныгы исписэлиистэр үлэ усулуобуйатын, социальнай пакеты, мэдиссиинэ страховкатын уонна кэлэр өттүгэр бигэ тирэх баар буоларын ордук сыаналыыр буоллулар.
Бу чинчийиигэ Арассыыйа үрдүнэн 3,2 тыһыынча көхтөөх үлэһит кыттыбыт. Түмүгэр эттэххэ, аныгы ыччат үлэттэн хамнаһы эрэ буолбакка, олох суолтатын уонна бэйэни сайыннарыыны күүтэр.
Бэй.кэр.
Хаартыска: Retail Life
