Дьиэттэн олорон үлэлээһин аныгы кэмҥэ ордук 19-30 саастаах эдэр ыччаты тардар. hh.ru портал аналитиктара Саха сиринээҕи үлэ рыногын чинчийэн, интэриэһинэй көрдөрүүлэри таһаардылар.
Хамнас төһө дииллэрий? Биһиги өрөспүүбүлүкэбитигэр дьиэттэн олорон үлэлиир вакансияларга ортотунан 74 400 солкуобай хамнаһы биэрэргэ бэлэмнэр. Ол эрээри үлэ көрдөнөөччүлэр баҕа санаалара арыый үрдүк — кинилэр ортотунан 80 000 солкуобайы күүтэллэр.
Кимнээх ордук көрдүүллэрий? Дьиэттэн үлэни биһириир дьон 36%-на — 19-30 саастаах эдэр исписэлиистэр. Ордук маннык идэлээх дьон дьиэтигэр олорон үлэлиэн баҕарар:
- Атыы-эргиэн менеджердэрэ;
- Программистар уонна ИТ-үлэһиттэр;
- Буҕаалтардар, дизайнердар уонна худуоһунньуктар;
- Маркетологтар, сэкэрэтээрдэр уонна техническэй өйөбүл исписэлиистэрэ.
Ханнык идэлээх дьон дьиэттэн үлэни буларыгар ордук чэпчэкиний? Билигин атыы-эргиэн менеджердэригэр уонна колл-киин үлэһиттэригэр дьиэттэн үлэлиир тоҕоостоох усулуобуйа элбэх. Ону таһынан, интернет-маркетологтар, программистар, техническэй өйөбүл исписэлиистэрэ, учууталлар уонна буҕаалтардар дьиэттэн олорон үлэлиэхтэрин сөп.
2026 сыл бастакы үс ыйын түмүгүнэн, Саха сириттэн 1,5 тыһыынча киһи дьиэттэн үлэни көрдөөн резюметын ыыппыт. Бу ааспыт сыллааҕар арыый аҕыйах (32%-нан түспүт) эрээри, үлэни дьиэни кытта дьүөрэлээн ыытар ньыма өссө да күүскэ сыаналанар.
Бэй.кэр.
Хаартыска: Getty Images Russia
