Бу күннэргэ ааспыт кыһын дьону өлөрбүт таксист бириигибэрэ таҕыста. 23 саастаах суоппары “куттал суох буолуутун ирдэбилигэр эппиэттээбэт өҥөнү оҥорбутун иһин” хаайдылар.
Былырыын Саҥа дьыл эрэ иннинэ, ахсынньы 27 күнүгэр, буолбут быһыылаан туһунан Саха сирин олохтоохторо бары аймана, долгуйа истибиппит. Ол күн сарсыарда 7:30 чаас саҕана 6 киһини тиэммит “Тойота Эстима” массыына Дьокуускайтан Чурапчыга айаннаары Даркылаах анныгар хойуу тумаҥҥа сиикэй ууга түһэн, дьон өлбүтэ.
Ууга түспүт массыынаттан суоппары таһынан 5 киһи быыһаммыта. Солуоҥҥа 11 саастаах кырачаан кыыс эрэ хаалаахтаабыта. Оттон 43 саастаах эр киһи төһө эмэ быыһанар суолу булбута эрээри, сиикэй ууттан 160-ча миэтэрэ тэйэн баран, көмө кэлиэр тиийбэккэ тоҥон өлбүтэ. Муҥар ол күн -44...-47 кыраадыс тымныы этэ.
Атын тыыннаах хаалбыт дьон эмиэ тоҥон өлүөхтэрин, ол күн дойдулаан испит спортсмен, биллэр тустуук Егор Явловскай баар буолан быыһааммыттара. Уол төһө да бэйэтэ эмиэ ууга түһэн баран сап саҕаттан салҕанан тыыннаах ортор, дьонноох сиргэ сүүрэн тиийэн көмөнү ыҥырыба.
Онон биэс араас кыра үлүйүүлээх-иһэлийиилээх киһини балыыһаҕа киллэрбиттэрэ.
Силиэстийэ соторутааҕыта дьэ түмүктэммит. 23 саастаах суоппар РФ Холуобунай кодексын 238 ыстатыйатын 3 чааһынан (судургутук эттэххэ, куттал суох буолуутун ирдэбилигэр эппиэттээбэт өҥөнү оҥорбутун түмүгэр икки киһи өлүүтэ) сууттаммыт, 5 сыл сэлиэнньэ-холуонньаҕа уураахтаммыт. Ону таһынан, 4 мөлүйүөн солкуобайы төлүүр буолбут. Массыына судаарыстыба туһугар былдьаммыт.
