Бу сыл саҕаланыаҕыттан Саха сириттэн анал байыаннай дьайыы буола турар сиригэр барыта 150 туонна гуманитарнай көмө барда.
Ол туһунан Донбасска көмөлөһөр хотугулуу-илиҥҥи пуонда уонна “Кыайыыга бииргэ” хамыыһыйа өрөспүүбүлүкэтээҕи ыстаабын сүрүннүүр киинин салайааччыта Георгий Куркутов сырдатта. Кини этэринэн, көмө тиһигин быспакка бара турар. Сүрүннээн, аадырыстаммыт таһаҕас, үтүө көмөһүт тэрилтэлэрин уонна иистэнэр сыахтар тикпит таҥастара-саптара, тэрилтэлэр, бэпэчиитэллэр, успуонсардар ыытар тэхиньиичэскэй сириэстибэлэрэ барар эбит.
Өрүс суола сабыллыбытынан, Мэҥэ Хаҥалас дьаһалтатын кытта кэпсэтэннэр, гуманитарнай көмө сорох өлүүтэ Аллараа Бэстээххэ мунньуллар буолбут. Бүгүҥҥү туругунан, онно 14 тиэхиньикэ тиийэн турар. Ону таһынан, бу күннэргэ госпиталларга барыахтаах таһаҕас бэлэмнэнэр дииллэр.
