2031 сылга Арктикаҕа дьоҕус кыамталаах атом ыстаансыйата тутуллуоҕа. Оччоҕуна хоту быстыбат, эрэллээх уонна сөбүгэр сыаналаах электро-уот баар буолуохтаах. Ол туһунан Ил Дархан Айсен Николаев ТАСС-ка кэпсээтэ.
“Өрөспүүбүлүкэҕэ дьоҕус кыамталаах атом ыстаансыйатын тутарга “Росатомы” кытта ыкса үлэлиибит. 110 мегаватт кыамталаах ыстаансыйа номнуо олоххо киирэн эрэр бырайыактары, бастатан туран, Усуйаана уонна Үөһээ Дьааҥы улуустарыгар, хааччыйарга 2031 сылга тутуллан үлэҕэ киириэхтээх. Итинник ыстаансыйа эрэллээх, быстыбат уонна сөбүгэр сыаналаах эниэргийэнэн хааччыйыахтаах, нэһилиэнньэлээх пууннар сайдар кэскиллэрэ түстэниэхтээх”, – диэн Айсен Николаев кэпсээтэ.
СИА суруйарынан, ол ыстаансыйа Күчүс, Кулар кыһыл көмүстээх, Тирэхтээх, Депутатскайдааҕы хорҕолдьуннаах уонна да атын сирдэри уотунан хааччыйыахтаах.
