Таатта Чөркөөҕөр Өрөспүүбүлүкэ күнүн көрсө Судаарыстыбаннас түмэлин таһыгар Платон Алексеевич Ойуунускай пааматынньыгын туруордулар.
Пааматынньыгы Емельян Ярославскай аат. Саха түмэлин көҕүлээһининэн оҥорбуттар. Скульптура ааптара – култуура туйгуна, саха бастакы худуоһунньуга Иван Попов сиэнэ Иван Попов.
Ити күн улуус олохтоохторун өрөспүүбүлүкэ салалтатын аатыттан бырабыыталыстыба бэрэссэдээтэлин солбуйааччыта Сергей Местников эҕэрдэлээтэ.
“Платон Ойуунускай пааматынньыга туруута – Саха сирин судаарыстыбаннаһын төрүттээбит дьоммутугар ытыктабылбыт бэлиэтэ. Кинилэр сахпыт санаалара уонна норуоттарын туһугар эппиэтинэстэрэ билигин даҕаны биһиэхэ сирдьит буолар”, – диэтэ Сергей Васильевич улуус олохтоохторугар туһаайан эттэ.
Үөрүүлээх миитиҥҥэ Таатта улууһун баһылыга Айаал Бурцев, Чөркөөх баһылыгын эбээһинэһин толорооччу Олег Ушницкай бар дьону эмиэ эҕэрдэлээтилэр.
