Эhигини Саха Өрөспүүбүлүкэтин Ил Түмэнин уонна тус бэйэм ааппыттан Өрөспүүбүлүкэ күнүнэн уонна Арассыыйыҕа парламентаризм күнүнэн ис сүрэхпиттэн эҕэрдэлиибин!
Муус устар 27 күнэ – Саха сирин элбэх омуктаах норуотугар көлүөнэлэри түмэр, үгэстэрбитин, сиэрбитин-туоммутун харыстыыр, инникини түстүүр уhулуччу суолталаах күн. Бу күн 1922 сыллаахха Бүтүн Арассыыйатааҕы Киин ситэриилээх кэмитиэтин Президиума Саха Советскай Социалистическай Өрөспүүбүлүкэтин автономиятын тэрийэр туһунан дэкириэт таһаарбыта. 70 сыл ааспытын кэннэ 1992 сыллаахха Саха Өрөспүүбүлүкэтин Арассыыйа Бэдэрээссийэтин тэҥ бырааптаах субъегын быһыытынан анал туругун быһаарбыт өрөспүүбүлүкэбит Төрүт Сокуона ылыллыбыта.
Бу бэлиэ күн биhиги саха омук чулуу уолаттара – Максим Аммосов, Платон Ойуунускай, Исидор Барахов, Степан Аржаков, Степан Васильев уонна да атын үтүөкэннээх дьоммут албан ааттарын сүгүрүйэ-махтана ахтабыт. Ытык дьоммут хорсун идиэйэлэрэ өрөспүүбүлүкэбит сайдыытыгар бигэ тирэх, кэнэҕэски кэскилигэр олук буолаллар. Бу күн өрөспүүбүлүкэ судаарыстыбаннаһын төрүттээбит дьоhун дьоммутугар, уhулуччулаах диэйэтэллэргэ анаммыт араас тэрээhини ыытарбыт үтүө үгэскэ кубулуйда. Ол барыта кэнчээри ыччаппытын патриотическай тыыҥҥа иитэргэ сүдү суолталаах.
Норуот сомоҕолоhуута, ааспыкка ытыктабыллаахтык сыhыаннаhыы уонна бэйэ бириинсиптэригэр бэриниилээх буолуу ханнык баҕарар тургутууну туораан иннибит диэки эрэллээхтик хардыылыырбытыгар төhүү күүс буолар. Билиҥҥи кэмҥэ Саха сирин норуоттарын ураты култуураларын, төрөөбүт тылларын харыстааhыҥҥа, үөрэҕирии, доруобуйа харыстабыла, билим уонна аныгы технологиялар сайдыыларыгар, ону тэҥэ дойдубут араас муннугар олорор дьоҥҥо табыгастаах усулуобуйа баар буоларыгар улахан болҕомто ууруллар. Биhиги Саха сиригэр киhи ис кыаҕын толору арыйан уопсай дьыала туhугар кылаатын киллэрэн тус суолун булунарыгар дьулуhабыт.
Өрөспүүбүлүкэ күнэ барыбытыгар айар-тутар саҥа күүс төрдө буоллун! Барыгытыгар чөл туругу, үтүөнү, бигэ туруктаах олоҕу, үлэҕэ ситиhиилэри, төрөөбүт дойду туhугар тулхадыйбат дьулууру, модун санааны баҕарабын!
Саха Өрөспүүбүлүкэтин Ил Түмэнин Бэрэссэдээтэлэ А.И. Еремеев.
