Муус устар 27 күнүгэр бэлиэтэнэр Өрөспүүбүлүкэ күнүн бырааһынньыгын көрсө Ил Дархан Айсен Николаев судаарыстыба уонна өрөспүүбүлүкэ наҕараадаларын туттарда.
“Муус устар 27 күнэ – барыбытыгар уонна Саха сирин сайдыытыгар уһулуччу суолталаах күн. 1922 с. автономия биллэриллиэҕиттэн, Саха АССР тэтимнээх сайдыыта саҕаламмыта. Ол кэннэ 70 сыл ааһан баран, 1992 сыллаахха, СӨ саҥа Төрүт сокуона ылыныллан, биһиги Арассыыйаны кытта тулхадыйбат биирбитин бигэргэппиппит”, – диэн Айсен Николаев үөрүүлээх тэрээһиҥҥэ эттэ.
Дойду бэрэсидьиэнэ В.В. Путин ыйааҕынан байыаннай ытык иэһи толорууга эрдээх санааларын, хорсуннарын иһин АБДь бэтэрээннэрэ наҕараадаланнылар:
- – Эрдээх буолуу уордьанынан – “Барс” батальон хамандыырынан сулууспалаабыт, Кэбээйи улууһун баһылыга Иван Левин;
- – “Хорсунун иһин” (“За отвагу”) мэтээллэринэн – старшина Прокопий Леонтьев уонна үс Эрдээх буолуу уордьан кавалера, ефрейтор Александр Находкин;
- – “Эр санаа” (“За храбрость”) II истиэпэннээх мэтээллэринэн – старшай сержант Павел Матвеев уонна рядовой Николай Кондаков;
- – “Өлөн эрээччилэри быыһааһын” мэтээлинэн – саньытаар Николай Слепцов.
Арассыыйа бэрэсидьиэнин Махталын “Сахатранснефтегаз” АУо уонна СӨ Дьарыктаах буолууга судаарыстыбаннай кэмитиэтин бэрэссэдээтэлин солбуйааччыта Семен Посельскай туттулар.
- СӨ “Хотугу сулус” уордьанынан СӨ Ытык сүбэтин бэрэссэдээтэлин солбуйааччы Иван Горохов наҕараадаланна.
- “СӨ Бочуоттаах олохтооҕо” ааты судаарыстыбаннай диэйэтэл Виталий Басыгысов ыылла.
Итини таһынан, кэккэ дьон өрөспүүбүлүкэ сойиальнай-экэнэмиичэскэй сайдыытыгар кылааттарын иһин “Гражданскай килбиэн” бэлиэлэринэн, судаарыстыбаннай бириэмийэлэринэн наҕараадаланнылар.
