"ZEMA", Ыччат Министиэристибэтэ уонна "Патриот" ыччат киинэ автопробегынан уонна Үс Хатыҥҥа дьоро тэрээһиннэринэн Дьокуускай куорат үрдүнэн үөрүү-көтүү тыынын тарҕаттылар!
Муус устар 27 күнэ – Сахабыт сирин төрүттэммит күнэ, өрөспүүбүлүкэбитигэр ураты суолталаах бэлиэ күн. Бу күнү Саха сирин ыччатын түмэр, биир сомоҕо күүс оҥорор "ZEMA" түмсүү, Ыччат Министиэристибэтин уонна "Патриот" ыччат киинин кытта бииргэ үлэлэһэн, үрдүк таһымнаахтык уонна умнуллубаттык бэлиэтээтилэр.
Өрөспүүбүлүкэ күнүн көрсө, ыччаттыын биир сомоҕо буолан тэриллибит автопробег саха дьонун уйулҕатын таарыйда. Дьокуускай куорат киэҥ нэлэмэн суолларынан айаннаан, төрөөбүт дойдуларыгар бэриниилээхтэрин көрдөрүлэр.Салгыы Үс Хатыҥҥа мустубуттар.
Тэрээһин саҕаланыытыгар Дьокуускай куорат ДПС үлэһиттэрэ суол быһылааннарыттан сэрэхтээх буолуу туһунан дьоҥҥо-сэргэҕэ олус туһалаах иһитиннэриини кэпсээтилэр.
Онтон киэһэ 22:00 чаастан саҕаламмыт эҕэрдэ кэнсиэр дьон сүргэтин өрө көтөхтө. Саха тылын, култууратын туһугар ыалдьар, талааннаах ырыаһыттар кэлэн, дьону кэрэхсэттилэр, ырыаларын бэлэхтээтилэр. Бу кэнсиэр сүрүн санаата – төрөөбүт сиргэ тапталы иҥэрии буолла. Ырыа-тойук, үҥкүү-битии доҕуһуоллаах дьоро киэһээ буолан ааста.
Тэрээһин үрдүк таһымнаахтык ааспытын да иһин, кыра ыарахаттар таҕыстылар. Үс Хатыҥҥа кэлбит массыыналар ахсааннара олус элбэх буолан, турар миэстэ тиийбэтэ. Бу кэлэр тэрээһиннэргэ учуоттаныаҕа диэн тэрийээччилэр тылларын биэрдилэр.
Өрөспүүбүлүкэ күнэ хас биирдии Саха ыччатын сүрэҕэр-быарыгар төрөөбүт дойдутугар тапталы, киэн туттууну иҥэрэн, инники кэскилгэ чаҕылхай эрэли саҕар!
Бэй.кэр.
