Дьокуускайдааҕы 17 №-дээх оскуола саҥа корпуһун тутуута 2026 сылга, барыл үлэтин түмүктээн уонна тутууга көҥүлү ылан баран, саҕаланыахтаах. Бу туһунан Саха сирин Ил Дархана Айсен Николаев Аан күн, быһа эфирг кэмигэр иһитиннэрдэ.
Ил Дархан бэлиэтээбитинэн, бу барыл үөрэх тэрилтэтигэр ыарахан үлэни судургутарга туһуланар.
«Билигин 17 №-дээх оскуолаҕа оҕо ахсаана олус элбэх: былааннаах кээмэйигэр 350 миэстэҕэ 1400 кэриҥэ оҕо үөрэнэр. Биһиги урут атыыласпыт эбии дьиэбит эмиэ кыһалҕаны быһаарбат – 150 эрэ үөрэнээччигэ анаммыт. Арассыыйа Бэрэсидьиэнэ Владимир Путин бигэргэппит Дьокуускай куорат сайдыытын сүрүн былаанын (мастер-план) көмөтүнэн, өрөспүүбүлүкэ киин куоратыгар хас даҕаны үөрэх тэрилтэтин тутуутун саҕалыыбыт. Сорох оскуолалар үлэҕэ киирбиттэрэ», — диэн Айсен Николаев эттэ.
Оскуолаҕа оҕо ахсаанын миэстэтин элбэтиигэ «Молодежь и дети» Национальнай барыл иһинэн саҥа корпуһу тутуу бырайыага олоххо киирэр.
«Билиҥҥи кэмҥэ барыл докумуоннара экспертизаны ааһа сылдьар. Бу эбийиэк оскуола оҕолоругар, педагогическай кэллэктиипкэ, төрөппүттэргэ уонна, уопсайынан, куоракка наада. Ыам ыйыгар тутуу саҕаланан, түргэнник түмүктэниэ диэн эрэнэбин», — диэн Саха сирин Ил Дархана бэлиэтээтэ.
Санатан эттэххэ, 2020 сылтан Саха сиригэр 62 оскуола уонна 35 уһуйаан үлэҕэ киирбиттэрэ, сүүстэн тахса үөрэх эбийиэгэ, ол иһигэр Арктика улуустарыгар эмиэ, толору өрөмүөннэммитэ. 14 тыһыынчаттан тахса оҕо аныгылыы, табыгастаах усулуобуйаларга үөрэнэр кыахтаммыттара.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.
Хаартыска: Андрей Сорокин / ЯСИА
