РФ Оборуонаҕа министиэристибэтэ куосумас аһылыгын бэлэмниир салаа исписэлиистэриниин икки сыл устата буорту буолбакка хараллыан сөп килиэби айбыттар. Ол туһунан Ас бырамыысыланнаһын уонна анал ас-үөл технологиятын институтун Куосумас аһылыгар салаатын салайааччыта Андрей Ведерников ТАСС-ка кэпсээбит.
Ведерников этэринэн, өр буорту буолбат килиэбит өссө 1960—1970-с сс. космонавтарга анаан оҥоһулла сылдьыбыт анал килиэп ырысыабын үтүгүннэрэн айбыттар.
Санаттахха, быйыл муус устар 1 күнүттэн Арассыыйаҕа сэлиэһинэйтэн оҥоһуллар үрүҥ килиэпкэ саҥа ГОСТ олохтоммута. Бу ГОСТ өссө 1986 с. бигэргэммит ирдэбил оннугар киирбитэ. Саҥа докумуоҥҥа сурулларынан, мантан антах оҥорон таһаарааччылар килиэби араас быһыылаах гыналлара көҥүллэммитэ: килиэп көнө муннуктуу эрэ буолбакка, төгүрүктүҥү эмиэ буолуон сөп дэммитэ. Оттон ыйааһына хайаан даҕаны “киилэ аҥаара буолуохтаах” диэн буолан бүппүтэ.
