Ыам ыйын бырааһынньыктара чугаһаабытынан, Саха сирин олохтоохторо салгын хампаанньаларын саайттарын олус күүскэ кэтииллэр, чэпчэтиини кэтэһэ, билиэттэрин түргэнник атыылаһа охсоллор. Ол курдук, бу сылга уон иһигэр (топ-10) киирбэтэр да, Саха сирэ дойду үрдүнэн саамай элбэхтик сааскы айаны былаанныыр, салгын сырыытын маныыр эрэгийиэннэргэ 11-с миэстэҕэ тахсыбыт.
Бу туһунан "МегаФон" уонна "Купибилет" диэн билиэттэри атыылыыр сулууспа холбоһуктаах чинчийиилэрэ туоһулууллар. Мобильнай сибээс хампаанньатын чинчийиитигэр олоҕуран, муус устар саҕаланыытыгар саха дьоно билиэттэри саайтка киирэн маныыллара сыл саҕаланыытааҕар 6 төгүл үрдээбит. Билиэти ыларга саамай көхтөөх күнүнэн Сүбэ күн (суббота) буолбут, Чөл күн (пятница) уонна Өрөбүл күн (воскресенье) эмиэ элбэх киһи киирбит. Оттон Орто күн (среда) дьон айан туһунан саамай аҕыйахтык толкуйдуур эбит.
Билиэттэри саамай көхтөөхтүк Москуба, Санкт-Петербург, Дагестан, Чечня, Самара уобалаһын уонна Хабаровскай кыраайын олохтоохторо көрөллөр. Саха сирэ бу эриэйтиҥ иһигэр 11-с миэстэҕэ сылдьар. Быйылгы ыам ыйын бырааһынньыктарыгар Арассыыйа иһинэн саамай сөбүлүүр хайысханан, «Купибилет» суруйарынан, Калининград куорат буолбут. Ону таһынан үс бастыҥ миэстэ иһигэр - курорттар Сочи уонна Минеральные Воды киирбиттэр.
Тас дойдулартан Стамбул бастакы миэстэҕэ сытар. Бастакы үс хайысхаҕа Анталья уонна Нячанг куораттар эмиэ бааллар. Азия дойдуларыгар интэриэс сүрдээҕин үрдээбит. Вьетнамтан ураты, Арассыыйа олохтоохторо Токиоҕа, Шанхайга уонна Пекиҥҥэ көтүөхтэрин баҕараллар уонна билиэттэри кэтии сылдьаллар.
Саамай ыарахан сыаналаах билиэт Токио хайысханнан – биир өттүнээҕи сыаната 89 000 солкуобай буолбут. Оттон саамай чэпчэки сыаналаах Арассыыйа иһинэн Санкт-Петербург уонна Казань хайысхатынан атыылана турбут.
Бэй.кэр.
Хаартыска: СӨ Тыраанспар министиэристибэтэ
