СӨ Хапытаалынай өрөмүөнүн пуондата Дьокуускайга элбэх кыбартыыралаах дьон олорор дьиэлэрин гааһын ситимин өрөмүөннүүр тэрилтэ көстөн биэрбэккэ кыһалҕаҕа олуйтарбытын суруйаллар. Муус устар 24 күнүнээҕи туругунан, Пуонда 9 эрэ бэдэрээттээх тэрилтэни кытта сөбүлэҥ түһэрсибит. Ол эбэтэр, былааҥҥа киирбит дьиэ 9%-нын өрөмүөннэтэргэ. Оттон Саха сиригэр 2026 с. 128 дьиэ гааһын ситимэ саҥардыллыахтаах. Онтон аҥаардас 98 дьиэтэ – Дьокуускайга.
Пуонда аукционугар кыттар хампаанньа букатын аҕыйах үһү. Дьокуускайга гаас өрөмүөнүгэр “Саха сиринээҕи гаас хампаанньата” ХЭУо эрэ дуогабар түһэрсибит.
Аны туран, элбэх кыбартыыралаах дьон олорор дьиэтигэр гаас ситимэ уларыйар буолла да, төрдүттэр барыта саҥардыллыахтаах. Аҥаарын уларытар уонна сороҕун кэлиҥҥигэ хаалларар көҥүллэммэт. Өссө биир кыһалҕа – кыбартыыралаах дьон гаас үлэһиттэрин дьиэлэригэр киллэрбэттэр.
“Гаас ситимин өрөмүөннүүр үлэҕэ саамай уустуга – дьиэлээх дьонтон көҥүл ылан, кыбартыыраҕа киирэн кыбартыыра иһинээҕи ситими уларытыы. Дьиҥэр, ол 15 эрэ мүнүүтэлээх дьыала эрээри, дьон аанын арыйыан баҕарбат”, – диир Хапытаалынай өрөмүөн пуондатын үлэһитэ Алексей Иванов.
“Ноото” диэн гаас ситимэ дьиэ олохтоохторо өрөмүөннэтэргэ бары сөбүлэстэхтэринэ, “ээх” диэн ааннарын арыйдахтарына эрэ саҥардыллар кыахтаах. Оннооҕор биир кыбартыыра хаһаайыннара ааннарын арыйбатахтарына, өрөмүөн үлэтэ тохтуур. Бу туһунан Айылҕа Гаврильева сырдатар.
