Манна бастакы арыйыылар, кимберлит турбалар уонна сэдэх таастар, геологтар, хайа үлэһиттэрин, көмүс уустарын үлэлэрин туһунан билиэххэ сөп.
Саха сирин Мииринэй куоратыгар Алмаас Түмэлэ арылынна. Бу бэлиэ тэрээһиҥҥэ өрөспүүбүлүкэ Ил Дархана Айсен Николаев уонна АЛРОСА хампаанньатын генеральнай дириэктэрэ Павел Маринычев кыттыыны ыллылар.
Хаартыска: ЯСИА
«Былырыын, АЛРОСА хаһаайыстыбаннай активын кэннэ, мин манна күүстээх үлэ бара турдаҕына сылдьыбытым. Ол кэмҥэ хампаанньа хамаандата былааннарын кэпсээбитэ, түмэл хайдах буолуохтааҕын көрдөрбүтэ. Дьэ, барыта үрдүк таһымнаахтык олоххо киирдэ. Аныгылыы ис хоһоонноох, олус кэрэ эйгэ буолбут. Хас биирдии саала уонна стендэ улахан тапталы көрдөрөр», — диэн Саха сирин Ил Дархана Айсен Николаев Мах мессенджерынан иһитиннэрдэ.
Бастакы кэлбит ыалдьыттарга экскурсия ыытан, бастакы арыйыылар, кимберлит турбалар уонна сэдэх таастар тустарынан, геологтар, хайа үлэһиттэрин, көмүс уустарын үлэлэрин туһунан кэпсээтилэр.
«Манна саха алмааһын сир анныттан хостонон, көмүс киэргэлгэ кубулуйар айанын көрүөххэ сөп. Ол киэргэл дьиҥнээх уус-уран оҥоһук буолуон иннинэ уонтан тахса идэтийбит илии нөҥүө ааһар. Мииринэй куоракка уонна Саха сиригэр бу олус суолталаах түгэн. Алмаас Түмэлэ улахан үлэ, талаан уонна көлүөнэлэр ситимнэрин тыыннаах устуоруйатын харыстыыр, Мииринэйи өрө тардыбыт уонна кини сайдыытын тосхолун олохтообут бөҕө майгылаах дьон устуоруйатын көрдөрөр. Бу бэлиэ күн бүгүн докумуоннарга уонна хаартыскаларга эрэ хаалбакка, кэлэр көлүөнэлэргэ тыыннаах, өйдөнүмтүө уонна кэрэхсэбиллээх буолара улахан суолталаах», — диэн Айсен Николаев бэлиэтээтэ.
Өрөспүүбүлүкэ Ил Дархана Алмаас Түмэлэ Мииринэйгэ сүрүн ыҥырар миэстэлэриттэн биирдэстэрэ буолуоҕа уонна бырамыысыланнас туризмын сайдыытыгар саҥа күүһү биэриэҕэ диэн бигэ эрэлин биллэрдэ.
«АЛРОСА хампаанньатыгар уонна түмэли тэрийиигэ кыттыыны ылбыт дьоҥҥо махтанабын. Маннык сирдэр Саха сирин, Мииринэйи уонна Арассыыйа алмаас бырамыысыланнаһын олохтообут дьону дьиҥнээхтик өйдүүргэ көмөлөһөллөр. Өскөтүн Мииринэйгэ кэллигит даҕаны, Алмаас Түмэлигэр хайаан да сылдьан көрүҥ!», — диэн түмүктээтэ.
Бэй.кэр.
Хаартыска: ЯСИА
