Төрүт омуктар өрөспүүбүлүкэ сайдыытыгар ураты кылааттарын киллэрэллэр
Арассыыйа Бэдэрээссийэтин аҕыйах ахсааннаах төрүт омуктарын күнэ, бэрэсидьиэн Владимир Путин ыйааҕынан быйыл муус устар 30 күнүгэр бастакытын бэлиэтэнэр. Бырааһынньыгынан Саха сирин Ил Дархана Айсен Николаев эҕэрдэлээтэ.
«Бу судаарыстыба таһымыгар ылыныллыбыт быһаарыы төрүт омуктар дойдубут устуоруйатыгар, култууратыгар уонна инники кэскилигэр ураты суолталарын бэлиэтиир. Саха сиригэр бу күн ураты суолталаах, тоҕо диэтэххэ, биһиги сирбитигэр үйэлэртэн үйэлэргэ төрөөбүт тылларын, үгэстэрин, олохторун сиэрин-майгытын уонна айылҕаны кытта дириҥ ситими сэрэнэн илдьэ сылдьар омуктар олороллор», — диэн Николаев бэлиэтээтэ.
Саха сирин Ил Дархана этэринэн, төрүт омуктар нэһилиэстибэлэрэ өрөспүүбүлүкэҕэ уонна Арассыыйаҕа сүҥкэн суолталаах.
«Аҕыйах ахсааннаах төрүт омуктар тустарынан кэпсэтэрбитигэр, бастатан туран бэйэлэрин күннээҕи үлэлэринэн, аҕа саастаахтар муударастарынан, оҕолорго кыһамньыларынан көлүөнэлэр тыыннаах ситимнэрин, үгэстэрин уонна төрүт сирдэригэр ытыктабылы харыстыыр дьон туһунан этэбит. Инник гынан култууралара дьиэ кэргэҥҥэ, түмсүүлэргэ, үлэҕэ уонна күннээҕи олоххо тыыннаах хаалар. Төрүт омуктар өрөспүүбүлүкэ сайдыытыгар ураты кылааттарын киллэрэллэр уонна Саха сирин элбэх омуктаах култууратын байыталлар. Биһиги сорукпут – бу тосхолу харыстааһын, үгэс буолбут олох сиэрин, уустар түмсүүлэрин, арктическай сирдэр сайдыыларын өйөөһүн уонна дьон бэйэлэрин сирдэригэр дьоһуннаахтык олороллоругар, үлэлииллэригэр усулуобуйаны тэрийии», — диэтэ Ил Дархан.
Бэй.кэр.
Хаартыска: ЯСИА
