Муус устар 27 күнүгэр, Өрөспүүбүлүкэ күнүн даҕата, Арчы дьиэтигэр Иван Николаевич Николаев-Уххан айымньылаах олоҕун уонна иэйиилэрин хоһуйбут хоһооннорун түмэн таһаартаабыт кинигэлэрин билиһиннэрдэ.
Ырыа буолан кынаттаммыт хоһооннорун туһунан уонна ол ырыалары толорбут саха эстрадатын артыыстара ыллаан үйэтитэн, олоххо тардыһыы, төрөөбүт тыл алыбыгар, тапталга, актыыбынай олоххо угуйар күүстээҕин итэҕэтэр.
Саха култуурата сайдарыгар кыах биэрэн элбэх ырыалаах улахан кэнсиэрдэри туруоран, айымньыларын норуотугар билиһиннэрэн ааспытын кэлэн истибит-көрбүт дьон бары сөҕөн санааларын этэн, махтанан тарҕаспытын өйдүүбүт.
Саха саарба тыллардаах хоһооноро, кини поэзиятын тыла дьикти күүстээх, хоһоонугар эппитин курдук, саха саарба тыллара сүрэҕин эмчиттэрэ.
Айымньылара уус-уран сытыы тыллаах, кини саха күндү тылын сонордьута.
Эрэгийиэннээҕи сэһэнньиттэр уонна хоһоонньуттар “Айар Кут Сойуус” чилиэннэрэ санааларын эттилэр, Уххан Уйбаан хоһоонньуттарга сөптөөх сүбэлэрин үллэстэригэр махтаннылар.
“Саха саарба тыллара” диэн Кэкэрдэ Зоя уонна “Учууталга уруй буоллун” диэн Аана Кыыһа Уххан хоһоонун аахтылар. СӨ биллиилээх, эстрада ырыаһыта, продюсер, “Сахафильм” хампаанньа дириэктэрэ Алексей Алексеевич Егоров-Өркөн Уххан хоһоонун тылларыгар хит буолбут ырыаларын иһитиннэрдэ. СӨ норуодунай артыыһа, ырыаһыт, ырыа айааччы Алексей Васильевич Егоров мааны ыалдьыт буолан Уххан хоһоонугар айбыт ырыаларын быһа тардан мустубут дьоҥҥо иһитиннэрдэ.
Алексей Васильевич Уххан хоһооннорун уус-уран тыллара барҕа баайын, ухханнаах, үлүһүтэр эрчимин, ханна да хатыламмат энчирээбэт сүдү күүһүн ыйан уонна өйө санаата далааһыннарына ханна да саха литэрэтиирэтигэр суох улахан суруйууларынан саха норуодунай бэйиэтэ буоларын билинэр кэм кэлбитин эттэ. Өр сыл айымньылаах үлэлэринэн алтыһан, доҕордоһон кэлбит, ырыа айыытын түгэннэрин кэпсээн ааста.
Биир улахан үлэлэрэ “Журавли над Ильменем” киинэ саундтрек суруйбуттарын, Уххан хоһоонун тылларыгар ырыанан улахан кэнсиэргэ үс тыйаатырга тэҥҥэ тэрээһин ыытар Ухханнаах кэмнэрин санаан ааста.
Ыҥырыылаах ыалдьыт саха дьонугар биллэр киһи Санаайа үтүө тыллары анаата, олоҕор олук алгыстары эттэ. Лэгэнтэй ийэтэ хоһоон аахта.
Сахалыы тыыннаах, киһини толкуйдатар умсулҕаннаах уһун кэпсэтиигэ бириэмэ барбытын билбэккэ Уххан Уйбаан айымньыларын дорҕоонноохтук ааҕарын дуоһуйа иһиттибит.
Соргулаах, соруктаах этиллибит баҕа санаалары сомоҕолоон сүһүөҕэр туруорары ситиһэргэ дьулус!
Кэкэрдэ.
