Ыам ыйын 1 күнүн киэһээ Дьокуускай сүрүн телебашнятыгар бырааһынньыктааҕы архитектурнай-уус-уран сырдатыыны холбуохтара.
Куорат олохтоохторугар уонна ыалдьыттарыгар дойду уонна эрэгийиэн судаарыстыбаннай бэлиэлэрин холбуур ураты динамическай сценарий бэлэмнэннэ, диэн «Якутия 24» РТРС «Саха Өрөспүүбүлүкэтин РТПЦ» филиалыгар сигэнэн иһитиннэрэр.
Саас уонна Үлэ бырааһынньыгар өрөспүүбүлүкэ киин куоратын үрдүнэн чаҕылхай уоттаах телебашнябыт киэргэтиэҕэ. Телебашня киэһээ 22:00 чаастан 00:00 чааска диэри сандаарыаҕа.
Икки чаас устата куорат үрдүк тутуутугар тыыннаах динамическай композиция көрдөрүллүөҕэ. Сценарий тосхолун Арассыыйа былааҕын өҥнөрө – үрүҥ, халлаан күөх уонна кыһыл – саҕалыахтара. Хас 15 мүнүүтэ аайы уоттар Саха сирин судаарыстыбаннай былааҕын палитратыгар – халлаан күөх, үрүҥ, кыһыл уонна от күөх дьүһүҥҥэ уларыйахтара.
«Архитектурнай-уус-уран сырдатыы үөрүүнү үөскэтэр ураты эйгэни тэрийиэҕэ. Уоттар ылаҥнаһыылара уонна өҥнөр уларыйыылара куораппытыгар бырааһынньык тыынын олохтуохтара, Дьокуускай олохтоохторун уонна ыалдьыттарын түмүөҕэ», — диэн тэрийээччилэр иһитиннэрдилэр.
Дьокуускай Телебашнята судаарыстыбаннай уонна эрэгийиэннээҕи үөрүүлээх тэрээһиннэр күннэригэр, уоттаах инсталляциялар сүрүн элеменнэрэ буолар, бырааһынньыктааҕы киэһэлэргэ куораты чаҕылхай өҥнөрүнэн киэргэтэр.
Бэй.кэр.
Хаартыска: Галина Мозолевская/ЯСИА
