Өлүөнэ күргэтин сүрүн тутуута 2027—2028 сс. ыытыллыа. Быйыл өрүс сүнньүгэр кырата биир коффердамы киллэрэн түһэриэхтэрэ (барыта үс буолуохтаах). Ол туһунан эмиэ Ил Дархан Өрөспүүбүлүкэ күнүнээҕи быһа эфиригэр кэпсээтэ.
Бүгүҥҥү туругунан, тутууга 400-тэн тахса киһини сэргэ 100-чэ араас тиэхиньикэ үлэлии сылдьар. Федеральнай киинтэн үбүлэнии боппуруоһа быһаарыллыбыт буоллаҕына, кэккэ боппуруостар өрөспүүбүлүкэ өттүттэн үбүлээһиҥҥэ бааллар. “Киин баан ыстаапкатын бырыһыаныттан кыратык тутуллабыт. Биһиги чааһынай дьон харчытын туһаныахпытын соччо баҕарбаппыт. Тоҕо диэтэххэ, кэлин тиһэҕэр ону барытын син биир өрөспүүбүлүкэ уйунарыгар тиийэр. Ол да буоллар болдьохтон хаалбакка иһэбит. Дойду бырабыыталыстыбата үлэни-хамнаһы хонтуруоллуу олорор”, – диир Айсен Николаев.
