Муус устар 30 күнүгэр Дьокуускай куорат Аржаков уулуссатын 5а дьиэтигэр олус истиҥ уонна наадалаах көрсүһүү буолан ааста.
Бу тэрээһин "Кыым доҕотторун түмэр" бырайыак чэрчитинэн тэрилиннэ. "Кыым" хаһыат уонна "Күрүлгэн" сурунаал эрэдээктэрдэрин кытта атах тэпсэн олорон кэпсэтии саҕаламмыта. Эрэдээктэрдэр сурутааччылар ыйытыктарыгар хоруйдаатылар.
Бырайыак сүрүн тиэмэтэ "Түөһэйии (деменция) диэн тугуй уонна хайдах охсуһуохха сөбүй?". Күннээҕи олоххо уустуктары үөскэтэр ыарыы тула кэпсэтиигэ АНО "Долгожить" дириэктэрэ Наталия Каратаева уонна ЯРПНД психиатр бырааһа Николай Сидоров кэлэн дьон ыйытыыларыгар толору хоруйдаатылар, бэйэлэрин баай билиилэринэн үллэһиннилэр.
Тэрээһини киэргэтэн ааста эдэркээн опернай ырыаһыт Мария Кузьмина – Маарыйа. «Көхтөөх уһун үйэлэнии” киинин уонна «Аврора” мэдиссиинэ килииньикэтин үлэһиттэрэ эҕэрдэ ырыаларын бэлэхтээтилэр.
Көрсүһүү ааҕааччылар уонна идэлээхтэр икки ардыларыгар аһаҕас кэпсэтиигэ, санаа атастаһыытыгар кубулуйда. Хас биирдии ыйытыыга болҕомтолоохтук эппиэттээтилэр, дьону долгутар кыһалҕалары быһаардылар. Маннык тэрээһиннэр дьону түмэр, билиинэн байытар уонна уопсастыбаҕа наадалаах ыйытыыларга хоруй биэрэр улахан суолталаахтар.
QR-куодунан киирэн тэрээһин хайдах ааспытын көр:
