Ыам ыйын бүтүүтүгэр Саха сиригэр пастереллез диэн сүөһү дьаҥын хааччаҕын тохтотуох курдуктар. Ол туһунан Ил Дархан Айсен Николаев салайан ыыппыт бырабыыталыстыба мунньаҕар эттилэр.
Бэлиэтээн эттэххэ, билигин “муҥутаан бэлэмнэнии хааччаҕа” диэн киирэн турар. Ол эрээри, бу күннэргэ ыытыллыбыт лабаратыарыйа чинчийиилэрэ пастереллез суох диэн көрдөрбүттэр. Ол да буоллар ый бүтүөр диэри Россельзохнадзор кыраныыссаны кыраҕытык кэтиэхтээх.
Даҕатан эттэххэ, итини таһынан мунньахха өрөспүүбүлүкэ сааскы ыһыы үлэтигэр толору бэлэмин туһунан эттилэр. Хаһаайыстыбалар дуогабар түһэрсэллэр, ыһыы сиэмэтин улахан аҥаарын өрөспүүбүлүкэ бэйэтин иһиттэн атыылаһыахтаахтар. Тыа хаһаайыстыбатын оҥорон таһаарааччылара ыам ыйын 5—10 күннэригэр диэри сиэмэнэн толору хааччыллыахтаахтар.
